Canada-ah Verstappen a chak zawn

Max Verstappen chuan Pathiannia tlan zawh tak Canadian Grand Prix-ah hnehna a chang; Circuit Gilles Villeneuve-ah hian tun hnai season thum chhung chu Verstappen hi a chak fai vek a ni.

Car intlansiakna sang ber hi tun season chhungin vawi kua an tlan tawh a, chung zinga parukah chuan Red Bull driver Max-a hi a chak a, champion nomawi a kawl lai humhim turin a dinhmun a siamṭha zel.

Kum 25 mi Verstappen hian pahnihna aṭangin intlansiak bul a ṭan a, a hmaah George Russell a tlan thung; ruah sur leh ni sa inthlak vel boruak karah Dutch tlangval hian a hma a awm tlan pelin Formula 1 huanga a vawi 60 nan a chak.

Lap 70 an tlan zawh meuh chuan Verstappen hi amah hnaih bertu McLaren driver Lando Norri aiin second thum chuangin a thleng hmasa zawk a, a tawp lamah buaina tur a nei lo.

Season hmasa kha chuan Red Bull car khalhtu Max-a hian a hmasa ber aṭanga bul ṭanin la zawng zawngah hma a hruai vek, nikum ang em em chuan tlan ṭha lo mah se hnehna chan nan a tawk.

Verstappen a chet fuh lai hian Lewis Hamilton erawhin season hmasa aṭang khan chak ni hmel a la hmu thei lo. Mercedes driver hi palinaah a thleng a, season thara Ferrari zawm tur hian champion beiseina la nei mah se beisei tih san a harsa ang.

Formula 1 hi June 23, Pathiannni zan hian Circuit de Barcelona-Catalunya-ah Spanish Grand Prix an tlan leh ang.