Pep-a'n Silva a la duh

Nipui transfer bazarah Manchester City player chhuak tura sawi an awm nual a, chung zinga mi goalkeeper Stefan Ortega-a'n contract a pawtsei tawh. Mahse, Bernardo Silva leh Julian Alvarez te hmalam hun a la chiang lo thung.

Man City manager Pep Guardiola chuan, "Chanchinbu lamah chuan Bernardo Silva chungchangah thuthang a tam hle. Thuchiang erawh Silva chungchangah hian Barcelona emaw club dang hrim hrim pawhin City an la be lo. Amah hi player ṭha tak a ni a, kan bulah a la cham ngei ka beisei," tiin Portuguese midfielder chungchang a sawi.

Spanish manager Pep-a hi La Masia chhuak a ni a, player anga a hming a chherna pawh Barcelona a nih bakah manager ang pawhin Catalan club aṭangin bul a ṭan. Barca enkawl leh chungchang zawhna chhangin Pep chuan, "A tawp tawh," tiin enkawl a tum tawh loh thu a sawi.