Scotland-in Super 8 beiseina nei

Scotland-in Pathianni zan khan Oman wicket sarihin an sawp a, Australia leh England awmna group-a awm chung siin Super 8 luh beiseina an chhi nung zel.

Sir Vivian Richards Stadium, Antigua and Barbuda-a inkhelah Oman hian bat hmasain 150/7 runs chauh an siam. Scotland-in 13.1 overs lekah 153/3 runs siamin hnehna an chang.

Scotland hi match hmasa berah England an hmachhawn a, ruah sur vangin an khel zo thei lo a, point khat ve ve an hmu. Three Lions hian Australia an hneh lo zui a, Scotland pawhin Aussies an hneh bik a rinawm loh. Hei vang hian Scotland leh England tan NRR ṭhat a pawimawh a, Namibia leh Oman sawp nasa zawk zawkin Super 8 an lut dawn.

Tun dinhmunah Scotland-in kawng dik an zawh mek. Oman an sawp hma hian Namibia chu wicket ngain an hneh tawh. Tunah hian an NRR hi 2.164 a ni a, Australia an hneh loh a nih chuan a tlahniam leh hret ang. England-in chak la nei lo mah se team chhe pahnih Namibia leh Oman te an la hmachhawn dawn a, an sawp dan a zirin Super 8 luhna kawng a inhawng ang.