LeBron hoin Lakers an champion

NBA club ropui ber zinga mi Los Angeles Lakers-in kum ruk chhung playoff an khelh phak loh hnuah nomawi an chawi leh ta a, nimin zing khan NBA finals game 6-ah Miami Heat 106-93 in an hneh a, an champion.

Lakers hian 4-2 in series an la a, vawi 17 an champion-na chiah niin an elpui Boston Celtics record an nih rual. AdventHealth Arena-ah LeBron James chuan triple double a nei a, NBA Finals MVP-ah an thlang.

Western Conference-ah Los Angeles Lakers pakhatna an ni a, regular season-a an chungnung ang bawkin playoff-ah pawh harsatna an tawk lo. 

Portland Trail Blazers, Houston Rockets leh Denver Nuggets te chu 4-1 vekin an hneh. Eastern Conference-ah regular season-a che ṭha pahnih Milwaukee Bucks leh Toronto Raptors te chu playoff-ah beisei an pha lo a, Lakers khingpui Miami Heat hi Eastern Conference regular season-ah pangana an ni pha chauh.

Lakers hi NBA finals khelh hma aṭangin champion rinkai an ni nghal a, Miami Heat lakah hian tlawm ngat se 'upset' lian tak a ni ngei ang. Amaherawhchu LeBron James leh Anthony Davis ten harsatna hranpa tawk loin an hneh.

Heat-in Jimmy Butler rawn let hnuah beiseina thar an nei a, game 5-ah hnehna an chan avangin Lakers lehthal theihna hun ṭha an nei. Amaherawhchu game 6-ah erawh Butler (12 pts), Bam Adebayo (25), Jae Crowder (12) leh Duncan Robinson (10) te awmna team hian Lakers an ngam ngang lo.

Lakers-in first quarter-ah 28-20 in hma an hruai a, second quarter-ah che ṭha lehzualin 36-16 a ni hial. Halftime-ah Lakers 64-36 in an chungnung a, chak tur a chiang der tawh!

LeBron James-a'n player danglam bik a nihzia pholangin 28 points, 14 rebounds leh 10 assists a nei a, offence leh defence-ah team tan a thawh hlawk hle. Chutihrualin LeBron hian thlawptu a mamawh a, Lakers-in Anthony Davis an kawl. AD hi LeBron tluk zetin a pawimawh a, hming langsar zawk an awm a ngaih avangin a chet ṭhat ngaihtuahin fakna a dawng tawk lo.

Anthony Davis hian 19 points, 15 rebounds leh assists vawi thum a nei a; Rajon Rondo (19), Kentavious Caldwell-Pope (17) leh Danny Green (11) te hming lam hmaih a thiang lo bawk.

Los Angeles-in nomawi an chawi hnuhnun ber chu kum 2010 kha a ni a, Kobe Bryant hoin an chawi. Kumin January 26 khan basketball legend Kobe Bryant hi helicopter chetsualnaah a fanu leh midang pasarih nen an thi. Lakers-in hlawhtlinna an chan hi Bryant-a tan an hlan.

Lakers star forward Davis chuan, "Van aṭangin chhuang takin kan hlawhtlinna hi min lo thlir ang. Kan ngai takzet a, kan hlawhtlinna hi a tan liau liau a ni," tiin a sawi.

Lakers general manager Rob Pelinka chuan, "Kobe leh Gianna te hian kumin chhung zawngin min awmpui a ni. Minute tin, ni tin, engtik lai pawhin ka bengah hian Kobe fuihna aw ka hre ṭhin. Basketball tana an sulhnu hi theihngilh a ni tawh lo ang," tiin a sawi.

Los Angeles Lakers ṭantute an stadium Staples Center kawt leh kawtthlerah pung khawmin, "Kobe, Kobe" tiin an au rual a, Bryant-a nupui Vanessa chuan, "Kobe leh Gigi ten hmu ve se ka ti ngei mai," tiin Instagram-ah a ziak.

Basketball chanchina player ropui ber zinga mi LeBron James-a'n LA Lakers champion puiin a ropuina a belhchhah. LeBron hi NBA history-a club pathum tana NBA Finals-a MVP ni thei hmasa ber a ni.

Kum 35 mi LeBron James hian kum 2018-a LA Lakers a zawm khan an ropuina ngaia dah let a tiam a, kum hnihna lekah kum ruk chhung playoff khel tawh lo club hi a champion pui nghal. LeBron fak mai loh chu tih theih dang a awm lo.

Basketball player ropui hian hlawhtlinna a chan hian a nu Gloria-i a be nghal. James chuan, "Tumahin min dang thei lo. Tuna ka hlawhtlinna hi harsatna i paltlang te ngaihtuah chuan eng tham mah a ni lo. Pathian hi chu a ṭha a ni, ka chawimawi zel theih che hi ka beisei," tiin a sawi.

James hian kum 2012 leh 2013 khan Miami Heat a champion pui a, MVP atan thlan a ni ve ve. Kum 2016 khan a pianna leh a larchhuahna club Cleveland Cavaliers a champion pui a, hetah pawh hian MVP-ah thlan niin tun ṭuma Lakers a champion puinaah pawh hian chanchin danglam a awm lo - a phu ang ngeiin MVP-ah thlan a ni. 

LeBron James chuan, "Ka tan he nomawi hi a hlu hle. He club tana ka khel thei hi ka in-chuang hle. Lakers ka pan dawn khan Jeanie (Lakers neitu) ka hrilh a, he club hi a ropuina ngaia dah let ka tiam. Tuna ka hlawhtlinna hi keimah chauh ni loin ka khelhpuite, coach-te, trainer-te leh he club tana mi zawng zawng tan a hlu hle a ni.

"Mi dang zah derna kan beisei. General manager Rob Pelinka, coach Frank Vogel leh club pawhin zah derna an duh a, Laker Nation pawhin zah derna a phut a, kei pawhin zah derna ka beisei a ni," tiin Lakers-in zah an phu thu a sawi.