Futsal Champions League-ah FC Barcelona an champion

Pathianni zan khan Palau Blaugrana, Barcelona-ah UEFA Futsal Champions League final khelh a ni a, Barcelona-in ElPozo Murcia FS 2-1 a hnehin an champion. 

Barcelona hi Futsal Champions League-a vawi thum an champion-na a ni a, kum 2012 khan Lleida-ah a vawi khat an nomawi an chawi a, kum 2014 khan Baku-ah champion lehin kum ruk hnuah an champion leh chauh.

Tun ṭum Champions League final-ah hian a vawi khatna atan Spanish club pahnih an inhmachhawn a, Barcelona-in minute 10 chhung lekin Dyego leh Aicardo hmangin hma an hruai. Second half-ah ElPozo-in Leo Santana hmangin si phurh sut ṭhen mah se Barca an ṭang tluan ta a ni.

Barcelona president Josep Bartomeu pawh a hmun en an phalsak tlem te zingah a tel.

Champions League-ah hian Spanish club Inter FS chu vawi nga champion tawhin record nei ṭha ber an ni a, Barcelona (3), Kazakhstan club AFC Kairat (2) leh Spanish club Playas de Castellón (2) ten an dawt. 

Spain-in futsal club an nei ṭha a, Champions League-ah vawi 10 an champion tawh a, record an nei ṭha fal hle. Russia (3), Portugal (2), Kazakhstan (2), Belgium (1) leh Italy (1) club te an champion ve tawh bawk. 

Football ang thoin futsal pawh FIFA hnuaiah khelh a ni a, FIFA hnuaiah Futsal World Cup thlengin a awm. Tun ṭuma inelna hi UEFA hnuaia khelh a ni a, Europe-a football leh futsal-a thuneitu sang ber UEFA hi FIFA hnuai tho a ni. Hetiang chiah hian FIFA hnuaiah AFC a awm a, AFC hnuaiah All India Football Federation a awm leh a ni.