India captain hlui Chapman a thi

Mizo player ṭhahnem tak chher chhuaktu Indian football coach langsar, India captain hlui ni bawk  Carlton Chapman chu nimin zing khan kum 49 mi niin Bangalore-ah lungphu chawlin a thi.

Carlton Chapman hi April 13, 1971 khan Bangalore, Karnataka-ah a piang a, Tata Football Academy aṭangin a inzir chhuak. Chapman hi 5ft 5in chauha sang a ni chungin India player ṭha a ni pha a, kum 1991 - 2001 chhung khan ram tan khelin 1997 SAFF Cup-ah phei chuan a captain hial.

TFA a zawm hma hian Chapman hi SAI Centre, Bangalore tan a khel a, hei hi hi a bul ṭanna tak a tih theih. TFA hnuah India club ṭha East Bengal, JCT Mills leh Kochin tan a khel a. Kum 2001 khan a captain-na hnuaiah East Bengal chu National Football League-ah a champion pui.

Santosh Trophy-ah Karnataka, Punjab leh West Bengal tan a khel a, kum 2001 khan football khelh chawlhsanin coach hna a thawk nghal. Tata Football Academy-ah head coach Ranjan Choudhary puitu a ni a, head coach hna a thawk zui bawk.

S. Malsawmtluanga a chhuak tawh a, 'Mizo Trio' tia hriat lar Jerry Zirsanga, Malsawma leh Vanlalrova te enkawlin hemi hnu hian Lalawmpuia (Tuaitea), Robert Lalthlamuana, Lalramluaha Hmar, Malsawmkima leh Henry Gangte-te a enkawl. 

Rova chuan, "TFA group-ah ṭhianten sir thih thu hi an rawn dah a, mak ka ti hle. Ka tan phei chuan a hlu lehzual. Churchill Brothers ka zawm theih chhan kha amah vang a ni a, player naupang dang pawh a pui nasa. India football tan chuan channa nasa tak a ni," tiin Chapman a ui thu a sawi.

Kum 2003 khan National Under 16-ah Mizoram an champion a, hemi ṭuma player pawimawh Sama Hnamte, Zaidinmawia Hmar, Malsawma (Zawlnuam) leh Tetea Tlau te chu India team-ah koh an ni a. Chapman hi India junior team-ah hian assistant coach a ni a, India team tur thlanna preliminary round-ah hian Lalchhuanmawia (Achhuana), Vanlalmawia (Buangpuia), Tuaitea leh Robert-te pawh an tel.

India junior team-ah hian Sama, Zaia, Malsawma, Achhuana leh Henry Gangte an tel zui a, England-ah intuai hriam nan an zin a, hemi hnu hian AFC Under 17 Championship khelin Japan-ah an zin a. India team manager hi MFA hruaitu zinga mi C. Vanlalmawia (Mawipuia) a ni.

TFA a enkawl lai hian Chapman hian Jharkhand Under 19 team a enkawl pah a, TFA-a a naupangte a hruai mai zel. Kum 2005 khan National Junior Championship-ah Robert, Tuaitea leh Ramluaha-te Lammualah rawn hruaiin semi final-ah inelna thlengtu Mizoram chu penalty shootout-ah hnehin final-ah Manipur an hneh leh a, an champion.

Chapman hian kum 2008 khan TFA hi first division (I League) a kai pui a, amaherawhchu thuneitu lamin I League khelh an phal tak loh avangin chona thar a hmachhawn. New Delhi club Royal Rangers a enkawl hnuah Shillong club Royal Wahingdoh a enkawl leh a, hetah hian Mizo player ṭhahnem tak hrawn lehin kum 2011 khan I Day Football khel turin Mizoram an rawn zin. Wahingdoh hian final-ah Shillong an hneh ta lo.

Wahingdon player hlui Sena Ralte chuan, "Min duhsak em em a, kan tihdik loh lai min hrilh peih ṭhin hle. Ka khel hi a rum deuh ṭhin nge 'Sena red card hmu suh aw' tiin min hrilh. Sir chu ka ngai dawn hle a ni," tiin a sawi. Chapman ho hian Wahingdoh hian Shillong Premier League-ah vawi thum a zawnin a champion a, kum 2011 hian Bordoloi Trophy nomawi an chawi bawk.

Chapman hian Royal Wahingdoh hnuah Bhawanipore FC, Sutdents Union, Sudeva Moonlight FC leh Quartz FC te a enkawl zui a. Gokulam Kerala chuan thuchhuah siamin Chapman hi reserve team-a lakluh an tum thu an sawi a, amaherawhchu Mizo footballer-te duhsaktu Chapman hi football zin kawng chauh ni loin a khawvel zin kawng a tawp ta thung.

Nimin khan AIFF chuan India captain hlui Chapman an uizia thuchhuah an siam a ni.