US dinhmun hriatna tur India

T20 Cricket World Cup-ah inelna thlengtu United States an che ṭha a, match hnih an khelh tawhah an la chak ve ve. Zanin dar 8:00-ah US-in champion rinkai zinga mi India an hmachhawn dawn a, an nihna tak a hriat theih ang. Naktuk zing dar 6:00-ah West Indies leh New Zealand te an inkhel dawn a, Super 8 khel tur zawnna ang hiala ngaih theih a ni.

US dinhmun a ṭha

United States-in cricket World Cup an thleng hrim hrim hi a mak tawh a, chu aia mak zawk chu inelnaa an che ṭha lehzel hi a ni. Match hmasa berah Canada nen Texas-ah an inkhel a, wicket sarihin an chak. Aaron Jones chuan thi loin ball 40 lekah 94 runs a siam a, a hming a langsar hle.

Canada hneh hi chu thilmak tia chhal tur a la ni lo. Mahse, US hian Pakistan an hneh tlat. Texas-ah bawk US hian Pakistan hi an hmachhawn a, over 20-ah 159 runs ve ve an siam. Super Over-ah US-in 18/1 runs siamin Shaheens-in 13/1 runs chauh an siam a, World Cup history-a upset lian ber zinga mi a ni.

Group khat aṭangin team pahnihin Super 8 an lut dawn a, US-in team ṭha ber dawttu Pakistan an hneh avangin Super 8 lut turin an dinhmun a ṭha. India hi hneh lo mah se US hian Ireland an hneh theih chuan Super 8 an lut thei dawn.

India B team?

US squad hi an theihna enin India B team pawh an ni pha dawn lo, chutihrualin India aṭanga pem an tam avangin India B team ti hiala sawi theih an ni. USA captain Monank Patel hi Ahmedabad-a piang a ni a, cricket khel turin US-ah a pem. Kum 2010 khan Green Card neiin kum 2016 aṭangin New Jersey-ah a inbengbel.

Bowler Saurabh Netravalkar pawh India rama piang tho a ni a, 2010 Under 19 World Cup-ah India tan a khel pha. Software engineer niin scholarship hmuin Cornell University-ah a zir zawm a, hemi hnu hian US tan inelna hrang hrangah a tel chho a ni.

Tamil-American spinner Nosthush Kenjige hi Alabama-a piang ni mah se kum khat a tlin hmain Karnataka-ah a pem a, kum 18 a nihin Karnataka tana khel turin Bengaluru-ah a cheng. Engineering zir turin US-ah a let a, cricket a khelh chhunzawm leh ta thung.

Spinner Harmeet Singh pawh hi 2012 U-19 World Cup-ah India tan a khel a, Mumbai Cricket-in an duh loh avangin Tripura lamah a kal a, a hlawhtling lo. Hemi hnu hian US-ah a kal ta thung.

Pakistan an hneh ṭuma Babar Azam vawm hlumtu Jaspreet Singh hi New Jersey-a piang ni mah se Punjab thingtlang khuaah a seilian. Cricket khel turin US a pan a, hlawhtlinna a chhar. Milind Kumar pawh Delhi tana Ranji Trophy khel tawh a ni a, a tikimtu ang chauh a nih avangin Sikkim a pan. Covid-19 hnuah US panin hming a chher zui a, World Cup khel tur zinga telh a ni.

Nisarg Patel pawh Ahmedabad-a piang a ni a, chutihrualin US tan hian kum 2006 khan Under 19 Cricket World Cup-ah a inlan tawh. US team-a player pariat hi Indian thisen kai an ni a, tun World Cup-a an chet ṭhat chhanah pawh a ngaih theih.

Engtin zel?

India-in Ireland an hneh hnuah Pakistan hneh leh mah se an khel ṭha tawk lo. Shaheens an khelh danah lawmna tur awm bawk mah se lawm lohna tur a tam zawk. Rohit Sharma captain-na hnuaia khel India team tan inrintawkna nei let turin US laka chet ṭhat a pawimawh.

Tun ṭum inelnaah Virat Kohli a la che ṭha lo a, ani hi chu paih thiang lo a nih vangin a chet ṭhat thuai a ṭul. Chutihrualin captain Rohit leh coach Rahul Dravid ten player khel tur an siksawi hret a nih pawhin a mak hran lo ang.

Chennai Super Kings tana player pawimawh Shivam Dube-a'n beisei a pha lo a, a awl a rinawm tawh zawk. Yashasvi Jaiswal bakah Kuldeep Yadav te chu US laka inlan thei dinhmunah an ding.

Bowling lam erawh Jasprit Bumrah a awm miau avangin batting lam ai mahin an ṭha tawh zawk emaw tih tur a ni. Chutihrualin India batter-te hian an theihna anga an khel thei a nih chuan run siam tam harna hmun New York-ah ngei hian 200 runs vaw tling thei an ni tlat.