Erik ten Hag-a hma hun a la chiang thei lo

Manchester United coach Erik ten Hag-a hma hun a la chiang thei lo a, Red Devils thuneitute chu an coach chungchangah hian inrawnkhawm mah se, he thu buatsaih a nih thleng hi chuan official-a thu puanzar engmah an la nei lo.

Ten Hag-a kaihhruaina hnuaiah United-in season duhawm lo tak an hmang a, Premier League-ah pariatna an ni. Mahse, an tlawm ngeina tura ngaih, FA Cup final-ah Manchester City chu 2-1 in an hneh.

Hei vang hian season thara ban mai tura ngaih Ten Hag chungchangah United thuneitute lu a hai leh ta deuh niin a lang a, thutlukna an siam hleithei lo - United hotute hian season liam ta an hman dan kha thlirletna an nei mek.

Hetihlai hian Ten Hag erawh a dan pangngaiin a la pawr viau a, Dutch coach hian Old Trafford-a a cham a inrin thu a sawi. Tun hnai khan Dutch media lamah United-a share neitu thar Ineos company chuan amah ring ngei chunga club dinthar an tum niin a sawi.

Mahse maw...

Ten Hag-a sawi ang mai erawh a ni lo tih a chiang. Dutch coach sawi ang hi ni ta se, United hian an coach cham tur thu an puang daih tawh ang - season liam ta thlirlet tura hun an duh reizia ngaihtuahin thu inchuh a awm niin a lang.

United thuneituten season hman zawh tak an thlirletnaah hian Ten Hag-a hma hun chungchang chu agenda zingah a tel a, ṭhenkhatin FA Cup final hma khan Ten Hag ban turin thutlukna an siam fel tawh ang hialin an sawi.

Mahse, Dutch coach hoin United an champion miau a, Sir Jim Ratcliffe-a'n Ten Hag ban thu puan mai harsa a ti ve tho niin a lang. United-in FA Cup nomawi an chawi chiah khan Ten Hag chu Sir Alex Ferguson hnua United boss, season zawna champion hmasa ber a ni ve leh tlat!

Chutihrual chuan league lama an sulhnu thlirin a lungawithlak si loh a ni. United hi pariatna an ni a, match 38 an khelhah vawi 18 chiah an chak a, vawi ruk draw neiin, vawi 14 ngawt an tlawm - an chak zat deuhthaw an tlawm tihna a ni a, uanpui chi a ni lo.

Coach inringtawk

League lama United dinhmun chhiatzia hrilhfiahna awlsam ber chu 1989-90 season hnua league season an khar chhiat ber a ni - khatihlai khan Sir Alex chuan United enkawl ṭanin, team a din ṭan mek a, English football-a coach hlawhtling ber pawl ni zui ta hi an ban ve teuh asin aw!

Heti chung hian season hmasaa League Cup-a United champion puitu ni bawk Erik ten Hag a hlauthawng lo a, Ajax coach hlui hian City an hneh hnu lawk khan, "He hmun ka rawn pan hian hnehna chang tura lo kal ka nih thu leh, team din tura lo kal ka nih thu ka sawi.

"Ka thil sawi pahnih hi ka ti ve ve bawk. Min duh tawh lo a nih chuan ka chhuak ang a, ka tih ṭhin dan angin hmun dangah nomawi ka chawi leh mai ang," a ti a, a inringtawk hle.

Ten Hag hian nomawi a chawi hnuah chawlh hmang turin Old Trafford a mangṭha zui a, a inrintawk viau laiin a chungchang ngaihtuahtute lu erawh a hai - an inhmuhkhawm hmasak ber aṭanga chhiarin kar thum a liam tawh a, thutlukna kan la hre lo!

A thlaktu tur

United buaina pakhat chu Ten Hag hi ban ringawt se, "Tuin nge a hmun ruak luah ang?" tihah zawhna a awm a, chhan a harsa tlat. Tun dinhmunah chuan Ipswich Town-a contract thar ziak hlim Kieran McKenna, England coach Gareth Southgate, Chelsea ban tak Graham Potter leh Brentford boss Thomas Frank te hming sawi rik a ni.

United fans tan pawh hming lam rikte en vang vang hian han phur hlutna tur a vang a, Ten Hag ban duh loh vang ni loin, a thlak thei coach-te thlira Dutch coach ban rih loh mai duh an tam zawk hial mai thei.

Sir Jim Ratcliffe chuan Bayern Munich nena inṭhen hlim Thomas Tuchel chu France-ah inbiakna a neihpui tawh a, mahse, Bayern-in chhuak leh lo tura an thlem hnua chhuah thlang zawk Tuchel hian United enkawl châkna a nei lo a, a enkawl dawn lo - chawlh hman rih a duh.

Red Devils hian Chelsea ban tak Mauricio Pochettino pawh an duh nia sawi awm mah se, Poch lam hi chu an hawi tawh lutuk lo niin an sawi - kar thum lai a liam ta a, thil chiang awmchhun chu engmah chiang a la awm lo, tih hi a ni rih.