United-in Sancho hralh an phal

Manchester United chuan an winger Jadon Sancho hralh an phal a, a man atan pound maktaduai 40 an chhiar. Sancho hi United manager Erik ten Hag nen an inhmu thiam lo a, season chawhnu lam kha Borussia Dortmund-ah loan-in a khel.

United-a beisei phak lo Sancho hian Dortmund-ah a theihna pholangin, inelna hrang hrangah match 21 a khelhsak a, goal thum khunga assist vawi thum neiin, Champions League final a hruai thleng.

Sancho hma hun hi United-a Ten Hag-a cham leh cham lohah a innghat nia sawi a ni hman a, mahse, Red Devils thuneitu lam hian tu pawh coach ni se, English forward hi chelh loa chhuahtir an duh zawk.

Dortmund chuan Sancho hi chelh duh mah se, loan bakin an ngam rih lo a, United erawhin a ngheta hralh an duh. Red Devils thuneitute chuan Financial Fair Play (FFP) thlir chungin, transfer-a an duh anga an bazar theih nan Sancho hralh mai hi a fuh zawkah an ngai a ni.

Kum 24 mi Sancho hian July 2021 khan Dortmund aṭangin United hi £73mtd-in a zawm a, kum hnih dang cham turin contract a la nei bawk. Mahse, Manchester City academy chhuak Sancho hian Dortmund angin United-ah hlawhtlinna a chhar lo.

Red Devils tan match 82 khela goal 12 chiah khungin, assist vawi ruk a nei a, League Cup bak nomawi chawi a la nei lo bawk. Sancho lakluh duhtu club an awm nual nia sawi a ni a, Juventus hming pawh a ri ring hle - United duh angin £40mtd sen an inhuam erawh a ngai dawn thung a ni.