Mizo fighter-te an che ṭha

'Rolling Rabbit' Northeast Open jiu-jitsu tournament neih zawh takah Mizoram aiawha feh chhuak infiammite an che ṭha a, Ju-Jitsu Association of Mizoram (JAM) aiawha kal fighter paliten gold medal pahnih leh bronze medal pahnih an lo hawn.

June 8, Inrinni aṭanga neih ṭan inelnaah hian Republic Veng tlangval Lalhmangaihzuala chuan senior (-58kg) ah gold medal a hlawh chhuak a, kum 18 hnuai lam inelnaah Chawnpui rawlthar Lalnunsanga (-65kg) chuan gold a hlawh ve bawk - gold hlawh chhuaktu pahnihte hi submission vekin an chak.

June 10, Thawhṭanni thlenga Shillong-a neih inelnaah hian Khatla tlangval MS Dawngtluanga chuan senior (-75kg) huangah bronze a hlawh a, amah ang thoa Khatla tlangval, Andrew VL Hruaitluanga chuan senior (-65kg) inelnaah bronze a la ve bawk.