Euro khel lo tur De Jong

Euro 2024 khel tur Netherlands tan chanchin lawmawm lo hriat tur a awm a, an midfielder pawimawh Frenkie de Jong chu a hliam a dam chian theih loh avangin Germany-a neih tur inelna aṭangin a inhnukdawk.

Barcelona midfielder hian March thla khan a kerekah hliam a tuar a, hemi hnuah hian Catalan club tan match thum bak a la khel leh lo. Heti chung hian Dutch coach Ronald Koeman-a'n a thlauh thla phal lo a, squad-ah a ko ta tho.

Mahse, kum 27 mi hi Euro khel turin a dam chiang hman dawn lo tih a chiang a, Germany-a zin ve lo mai turin thutlukna a siam ta zawk a ni. De Jong hian season hman zawh takah khan Barca tan match 30 chiah khelin goal hnih a khung.

Netherlands tan match 54 a khel tawh a, goal hnih khungin assist vawi ruk a nei bawk. Hetihrual hian Dutch team-in chanchin lawmawm lo dang an nei bawk a, nimin khan Atalanta midfielder Teun Koopmeiners chu squad aṭangin a inhnukdawk ve bawk.

Kum 26 mi Koopmeiners hian season hman zawh takah khan Atalanta tan match 51 khela goal 15 khungin, assist vawi sarih a nei a, Europa League nomawi a chawi bawk. Ram tan match 21 khel tawhin, goal hnih leh assist vawi hnih a nei a, a awm lo tur hi Netherlands tan chuan chânna a tling dawn.

Player pahnih inhliam hi Ian Maatsen lawmah a tla a, ram tana la inlan ngai lo fullback hi Chelsea player niin, January aṭang khan loan-in Borussia Dortmund-ah a khel a, a hming a chher hle.

German club hi Champions League final a luhpui a, league-ah match 16 khelin goal hnih a khung a, assist vawi hnih a nei. Champions League-ah pawh match sarih khelin, goal khat a khung.

Euro 2024-ah hian Netherlands hi group D-ah an awm a, June 16, Pathianni zanah Poland nen an match hmasa ber khelin, France leh Austria an awm bawk!