Euro Group D : Champion thei team awmkhawmna chu!
European Championship 2024 khelh hun a hnai takzet ta a, champion tura rinkai zingah France an tel - Didier Deschamps enkawl team hi Group D-ah awmin an kawng erawh a awlsam dawn lo.
France hi Netherlands, Austria leh Poland te nen an awmkhawwm a, a tawi zawnga sawi dawn chuan eng ram team mah hi tlang chiang sa tia sawi a rem lo, inhneh kual turin player an nei ṭha tawk vek a ni.
France
Manager: Didier Deschamps
Captain: Kylian Mbappe
Qualifying record: P8, W7, D1, L0, GF29, GA3
Euro 2020: Round of 16
Most caps in squad: Olivier Giroud (133)
Top scorer in squad: Olivier Giroud (57)
France hian inelna lian an hmachhawn hnuhnung chu Qatar World Cup kha a ni a, khawvel huap inelna lian leh ngaihhlutah hian final an lut phak, kum tam a la liam loh avangin an chhe thut lo ang tih a rin theih.
Didier Deschamps-a'n player a neih dan a zirin a naute khelh dan hmang a tidanglam ṭhin. Forward Antoine Griezmann chu ball sem tura a pawh hnun leh a rinawm a, a hma sirah Kylian Mbappe leh Ousmane Dembele te an awm ang.
Ram tana goal khung tam ber, tun inelna hmachhawn tur zinga Les Bleus tana inlan tam ber ni bawk Olivier Giroud hi minute zawng zawng khel turin a upa deuh tawh a ti a nih pawhin, khelmual chhungah a hmel kan la hmu tamin a rinawm.
France hlauhawmna tur lai chu a sir lam a ni - Mbappe leh Dembele te aia foward ṭha hi khawvelah an awm bik chuang lo a, an hlauhawm lehzual theihna tur chu tlarhnung lam aṭanga puitu an neih dana zir a ni thei bawk.
Theo Hernandez, Jules Kounde leh Jonathan Clauss te hi a hma lam thlawp a, mual sir leh a lai lama ball pe thiam an ni. Mbappe tana hmun ruak siam thiam nih a pawimawh bawk a, anni hian goal nawr kawngah tha an thawh hlawk tura ngaih a ni.
Tlarhma lam an hriam viau rual hian a hnung lam erawh rem phui a ngai dawn. A hnung lam phui tur chuan defender chauh an pawimawh lo a, midfield aṭanga a phui ṭhat a ngai; rin loh taka N'Golo Kante a koh avangin danglam an tum tih chu a rin theih.
Netherlands
Manager: Ronald Koeman
Captain: Virgil van Dijk
Qualifying record: P8, W6, D0, L2, GF17, GA7
Euro 2020: Round of 16
Most caps in squad: Daley Blind (107)
Top scorer in squad: Memphis Depay (45)
Ronald Koeman enkawl an ni a, an khelh dan phung pawh an thlak danglam ngun hle - an khingpuite a zirin 3-2-4-1 leh 4-2-3-1 formation an inhman thlak fo a, match pakhat an khelh lai ngei ngei pawha inthlak thut an chin avangin an khingpui tan inbuatsaih uluk a ngai ang.
An ṭhat tawk lohna leh inven an ngaihna en hmasa ila - team lian lakah an tlarhnung a pherh ṭhin. Euro qualifying an khelh lai khan team nem zawk Greece, Gibraltar leh Republic of Ireland te vawi hnih ṭheuh an hmachhawnah vawi nga goal an chhuah lo.
Mahse, France nen an intawn hnuhnung pahnihah goal ruk ngawt an chhuah. Nations League lam en chuan Croatia leh Italy bakah Germany an tum ṭumin goal an chhuah nasa a, coach Koeman tan siamṭhat ngai a awm tihna a ni.
Liverpool defender ṭha Virgil van Dijk leh Manchester City tana Premier League nomawi chawitu Nathan Ake te an nei a, Bayer Leverkusen tana season duhawm hmangtu Jeremie Frimpong leh Inter Milan defender Denzel Dumfries te an nei bawk.
Qualifying an khelh ho bakah Euro leh World Cup hnuhnung kan thlir chuan Dumfries hi a pawimawh leh dawn. Goal venhim bakah striker tana ball siamsak thiam a ni a, a tlan chakin hmun ruak a hnawh khat thiam em em bawk a, enbik hlawh tur a ni ang.
Hliam vanga Frenkie de Jong tel thei lo tur erawh a pawi an ti ang - Barcelona midfielder hmun ruak hi hnawhkhah a harsain a rinawm. Georginio Wijnaldum a tlahniam ve deuh tawh nen, kum 21 mi Xavi Simons chungah mawhphurhna a lian dawn.
Austria
Manager: Ralf Rangnick
Captain: Marko Arnautovic
Qualifying record: P8, W6, D1, L1, GF17, GA7
Euro 2020: Round of 16
Most caps in squad: Marko Arnautovic (112)
Top scorer in squad: Marko Arnautovic (36)
Austria hian tun hma chuan Franco Foda duh danin an khel ṭhin a, mahse World Cup khel turin an tling zo lo. Kum 2022 nipui lai khan Ralf Rangnick chu an team enkawl turin an la lut a, thil kalhmang thlak niin an danglam ta hle.
Ram lian leh football ram ropui tak ni lo tan chuan player ṭha pakhat chan pawh a uiawm ṭhin - Austria hian an captain David Alaba chu hliam vangin tun ṭumah hian an chhawr thei dawn lo, an ram tana a pawimawhzia ngaihtuah chuan an channa hi a nasa hle.
Real Madrid defender Alaba hi a ṭul chuan midfield-ah pawh khelhtir theih a ni a, tun ṭumah hian inkhel thei lo mah se Austrian Football Federation chuan team enkawltu zinga tel turin an ti tho a, hei hian a pawimawhzia a tifiah hle a ni.
Euro 2016 leh 2020 khan Alaba hi ram tan a inlan a, hmun pawimawh luahtu a ni. Nikum December thla khan a khup a hliam a, tun thlengin a la inkhel thei lo. Coach Rangnick pawhin squad puan hun tawp thleng a ngaihchan thu sawi mah se inkhel turin a inpeih hman lo.
Rangnick enkawlna hnuaiah 4-2-2-2 angin an inrem ṭhin a, tun Euro-ah pawh hei hi an hman a rinawm. Hetianga an inrem chuan tlarhmaa striker pahnih awm fal kha a hnung leh sir aṭanga ball pek an tum ṭum ṭhin, defender ball pass thiam an pawimawh zual.
Premier League leh Serie A lama a theihna lantir tawh Marko Arnautovic an nei a, ani lah Marcel Sabitzer ten en bik an hlawh ang. Coach Rangnick hi Bayern Munich sawmna hnartu a ni a, a tumah a chian em avangin a kaihhruai team hi hmuh an châkawm.
Poland
Manager: Michal Probierz
Captain: Robert Lewandowski
Qualifying record: P10, W4, D3, L3, GF15, GA11 (playoff an khel)
Euro 2020: Group stage
Most caps in squad: Robert Lewandowski (150)
Top scorer in squad: Robert Lewandowski (82)
Poland hian nikum September thla khan an coach Fernando Santos an ban. Portugal champion pui tawhtu kaihhruaina hnuaiah hian Czech Republic, Moldova leh Albania te an hneh lo a, an dinhmun a ṭhat loh avangin danglamna beiseiin coach an ban a ni.
An ram under 21 coach Michal Probierz chu senior team enkawl turin an dah chho a, a kaihhruaina hnuaiah hian tun hma lama defender pathum an hman ṭhin chu 5-3-2 formation hmanga thlak a ni a, an tlarhnung a phui phah avangin hmasawnna a ni.
Jan Bednarek leh Jakub Kiwior te bakah wing-back Nicola Zalewski leh Przemyslaw Frankowski ten hmun pawimawh an chang ṭhin bawk a, inelna lian an hmachhawn hunah pawh a hnung lam chu an inrem ṭhin dan pangngai an hman a rinawm.
Zalewski leh Frankowski te hian a laiah ball an cross lut thei em em a, striker ṭha Robert Lewandowski leh Krzysztof Piatek te tan ball an pek thiam miau avangin an hmanraw hlauhawm an ni, ram dang pawhin an ven uluk ngai lai tur a ni ang.
Barcelona striker Lewandowski-a'n ram tan match 150 aṭangin goal 82 a khung tawh, match khel tam ber a nih bakah goal a khung hnem ber bawk - tun hnaiah ram tan che ṭha tawk lo mah se boruak sangah chuan a tawnhriat neihte a ṭangkai leh dawn.
Kumin August thla hian Lewy-a'n kum 36 a tling tawh dawn a, tun ṭum hi ram tana Euro a khelh hnuhnung ber a nih a rinawm. A hun tawpnaah an ram hi a sang thei ang ber thlen pui a duh dawn, a hmasa atan group stage paltlang phawt an tum dawn a ni.