Dallas an la tlawm bik lo

NBA Finals khelh laiah Boston Celtics an che ṭha a, game hmasa pahnih an la. Ningani zing dar 6:00 hian game 3 an khel dawn. Dallas Mavericks coach Jason Kidd chuan thawhchhuah ngei an tum tur thu a sawi.

Jason Kidd chuan, "Inelna a la tawp lo, a hmasa pahnihah chak lo mah ila kan la tho chhuak thei. Hei leh chen hi kan kal tawh a, kawng lakah kan tawpsan thiang lo, game 3 la turin kan theihna zawng zawng kan hmang ang," a ti.

NBA Finals hi best of seven series hmanga khelh a ni a, champion tur chuan a tlem berah vawi li tal an chak a ngai. Game hmasa pahnih kha Celtics khelmualah an khel a, game 3 erawh American Airlines Center-ah an khel tawh dawn - Dallas lam mual a ni ve thung a, inrintawkna an nei sang hi a mak lo.