Man United manager Mourinho

An nghak rei deuh a, nghah tham a ni ve hrim hrim bawk. Ni thum chhung inbiak hnuah Manchester United-in nimin khan Jose Mourinho chu an manager a nih tur thu official-in an puang ta.

Hlawh leh a chhehvel

Portuguese manager hian kum thum chhung atan contract a ziak a, a hlawh tur zat erawh an inrinsiak thung. Tarlan dan pakhatah chuan Mourinho hian kum khatah pound maktaduai 12 a hlawh ang a, kum thum chhung chuan pound maktaduai 36 a hlawh pha ang. The Special One hian Premier League nomawi a chawi pui thei a nih chuan pound maktaduai 2.5 a dawn belh ang a, Champions League a champion pui thei a nih chuan pound maktaduai 5 in a hausak belh ang.

United-in an ban tak Louis van Gaal-a'n kum 2014 khan kum thum chhung atan pound maktaduai 22 a hlawh a, kum khat contract la awm chunga an ban tak avangin zângnadawm nan pound maktaduai 5 an chawi niin tarlan a ni. Dutch manager aiin Mourinho hlawh a tam a, amaherawhchu The Special One aiin Tiki Taka tilartu Pep Guardiola-a'n Manchester City-ah a hlawh tam zawk. Spanish manager hian season khatah pound maktaduai 15 a hlawh dawn.

#Welcome_JOSE

Portuguese coach hian 2016-17 season aṭangin United a enkawl ṭan ang a, kum 2020 thleng a awh dawn. Kum 2003 aṭang khan Mourinho hian nomawi 22 a chawi tawh a, United lam pawh hetiang ang manager hlawhtling an la lut thei hi an lawm hle.

United executive vice-chairman Ed Woodward chuan, "Jose hi tunlai khaw-vela manager ṭha ber chu a ni. Europe khawmualpuiah a hming a chher a, nomawi a chawi a, vawi thum nomawi a chawi tawh avangin Premier League pawh a hrechiang a ni. Manchester United-in kan la lut thei ka a, a sulhnu thlir hian hmalam min pan pui thei turin theihna a nei a ni," tiin manager thar a chhuang hle.

Mourinho hian defensive game a khelh ṭhin avang leh player naupang a hman ngai loh avangin a duh dan hi United kalphung ni loin an sawi. Amaherawhchu United defender hlui Rio Ferdinand chuan, "Premier League-a Mourinho kan hriat tirh khan wing-a Robben leh Duff hmangin game rang tak a khel a, United tana chhawp chhuah tur dang a la nei ang. Player naupang a hman dan erawh hunin a la hril ang chu," tiin Mourinho chu a ringtawk hle.

The Special One

United manager thar Mou-rinho chuan, "Manchester Uni-ted manager nih hi football-a chawimawina pakhat a ni. He club hi khawvel pum huapa lar a ni a, hriatthiam theih loh zun zam neih hi club dang tana el phak loh a ni," tiin a hna thar chung-changah a lawm thiam hle.

Portuguese manager chuan sawi zelin, "Old Trafford nen hian inlaichinna thuk tak kan nei a, helai hmuna ka thil tawn tawhte hian ka thinlungah hmun pawimawh tak a chang a, supporter-te nen pawh kan inkungkaih ṭha hle. An manager ka ni tur hi ka phur a, hun kal zel turah pawh an ṭawiawmna ṭha tak neih chhunzawm zel hi ka beisei tlat a ni," tiin a sawi.

Coach special tak hian player ṭha bik ken tel a nei dawn a, Zlatan Ibrahimovic pawh a ni thut thei. Sweden captain hian a hmalam hun chungchangah thutlukna a siam tawh thu a sawi a, a kalna tur erawh a sawi chiang lo.