I league goal khung thei Naupang ber Samuel

28th May, 2016

India rama club foot-ball inelna sang ber chu I League a ni a, ram khat league sang bera khelh phak a harsa - chu aia harsa lehzual chu goal khung thei naupang ber nih hi a ni.

Mahse, chu thil har-sa chu Shillong La-jong forward Samuel Lalmuanpuia'n March 1, 2016-a Aizawl FC an hma-chhawn ṭumin a tih theih a ni tih a tarlang a, a club hlui lakah 3-1 a an chakna inkhelah hian goal khat khungin I League chanchina goal khung thei naupang ber ni turin record thar a siam.

Samuel-a hian a club hlui laka a goal khung a lawm avangin sawisel a hlawh a, I League-a a season hmasa bera a goal khung hmasak ber a nih miau avangin Mizo rawlthar hi dem theih a ni lo.

Zemabawk North rawlthar record hi hriat lawk ni lo mah se tun hnaiah Shillong Lajong chuan an rawlthar duhawm hi I League-a goal khung thei naupang ber a nih thu an puang a, Mizo club laka goal khungtu hi kum 17-a upa a ni.

I League-a a season hmasa ber hmangtu Samuel-a chuan, "I League-a goal khung thei naupang ber ka ni tih ka hriat kha chuan sawi tur pawh ka hre lo, mak ka ti a, ka lawm takzet a ni. Pathian min hruai dan hi mak ka ti a, a malsawmna ka dawng nasa lutuk hi sawifiah thiam pawh a harsa zawk a ni," tiin Pa-thian malsawmna a dawn vanga tun dinhmun thleng thei a nih thu Vanglaini palai a hrilh.

Nikum Shillong Pre--mier League-ah Samuela hian goal 10 khungin top scorer a ni a, assist vawi thum a nei bawk. Hetichung hian Zemabawk rawlthar chuan inngaitlawm takin, "SPL-a ka khelh ṭhat viau pawh ka hre lo a, heti chung hian I League-ah ka season hmasa ber hman tir ka ni. Squad-ah te chuan tel ve ka inbeisei a, match 14-a match 11 khelh erawh ka beisei lo. Brazilian striker pahnih Fabio Pena leh Uilliams Bomfim an awm bawk a, ka tun dinhmun hi chu awih a harsa a ni," tiin a beisei phak baka hma a sawn chak thu a sawi.

Samuel-a chuan hmabak tam tak a la neih thu sawiin, "Kan kum a la naupang a, kan taksa pawh a la lian tawk lo. Theihtawp chhuah chhunzawm zel ka tum a, a sang zawk zel beisei ka duh a ni. Engtikah emaw chuan ram tan ka la inlan ve ngei ka beisei a, India jersey ha chunga khelmual chhunga inlan ka chak a ni," tiin I league goal khung thei naupang ber nihah tawp mai a tum lo.