French Open Grand Slam match 200 chak thei Nadal
Tennis player te châk ber chu Grand Slam champion a ni. Ningani zan khan Rafael Nadal chuan Facundo Bagnis lakah hnehna changin major tournament-ah hian match 200 hnehna a chang ta chiah a, a vawi 10 nana French Open champion ni thei turin second round a paltlang leh ta phawt. French Open inkhel hi E-News (True Sports channel)-ah live a en theih a ni.
Roland Garros, Paris-a inkhelah Nadal hian world number 99 Bagnis lakah hian game hmasa pahnih a hloh nghal! Mahse, 'King of Clay' tia an hming lem an vuah Nadal hian game 22 an khelh chhunzawm aṭanga game 18 zet lain darkar hnih pawh tling loah 6-3, 6-0, 6-3 in hnehna a chang.
Kum 29-a upa Nadal hian Grand Slam match 230 a khelh tawh aṭangin vawi 200 hnehna a chang thei a, clay court tournament bikah chuan record nei ṭha ber niin match 399 a khelh aṭangin vawi 365 ngawt hnehna a chang thei a ni.
Spanish tlangval Nadal hian French Open bikah match 72 a khelh aṭangin vawi hnih chiah chak loh a la nei a, player dang ten a record hi an tluk lo hle. Grand Slam pali chhiar khawm chuan Roger Federer-a'n vawi 302 hnehna chang tawhin pakhatna dinhmun a la luah a, world number 1 Novak Djokovic chuan match 216 hnehna a chang tawh bawk.
Grand Slam vawi 14 cham-pion tawh Nadal chuan, "Grand Slam a hnehna ka channa hmasa ber chu kum 2003 Wimbledon kha a ni a, tun thlengin ka la theihnghilh ngai lo. Match 200 chak hi a pawimawh ber a ni lo a, hei chu number mai a ni. A pawimawh ber zawk chu third round ka lut hi a ni," tiin a dan pang-ngaiin a inngaitlawm leh hle.
Tun hnaiah Nadal hi a khel
ṭha takzet a, match hnih a khelh
aṭangin game kua chiah a la hloh. A lungawi thu sawiin chhunzawmin Nadal chuan, "Hmasawnna tur leh inzir tur ka la nei reng a, inbuatsaihna ngawrh takin ka neih chhunzawm ṭhin. Tunah hian tunhma deuh ang khan ka khel ṭha tluang rih viau a, mahse a pawimawh ber chu nitin hian thawnthu thar ziak tur kan nih avangin hma hun tlir thiam a pawimawh ber," tiin a sawi.
Djokovic nge nge
ATP ranking-a chawlhkar 200 chhung number 1 ni thei Novak Djokovic pawhin third round a lut. Mahse, Serbian thiampuipa hian awlsam takin hnehna a chang bik lo. World number 161 Steve Darcis lakah a service hmasa pahnih a hloh a, 6-3, 4-6, 5-7, 6-2 in a chak hram a ni.
Kum 29-a upa Djokovic chuan, "Game hmasa pathum hloh kha chu inkhel bul ṭan dan duhawm lo tak a ni a, a leh pekah chuan khatiang kha a thlen tawh loh ka beisei. Unforced errors ka nei tam a, ka khel ṭha lo, a pumpuia thlir erawh chuan Steve khan fak phu khawpin a khel," tiin a khingpui a fak tel zauh.
Djokovic hian tun hnaiah mipa tennis a awp hneh viau a, season hmasa khan Australian Open, Wimbledon leh US Open-ah te a champion. Mahse, Djokovic hian hlawhtlin theih rih lohna hmun a nei a, chu chu French Open hi a ni. Tun hnai season thum chhungin final lut vek mah se a vanduai zawkah a ṭang zel a, kuminah beiseina a nei sang ve tawh hle.
Mipa inkhel dangah khawtual tlangval Jo-Wilfried Tsonga chuan set hmasa pahnih a hloh hnuah Marcos Baghdatis chu 6-7, 3-6, 6-3, 6-2, 6-2 in a hneh a, seeded 12-na David Goffin pawhin Carlos Berlocq lakah 7-5, 6-1, 6-4 in hnehna a lo chang ve bawk. Seeded 13-na Dominic Thiem pawhin third round a inhlangkai. Player langsar zingah seeded parasihna Tomas Berdych a chak zo lo a, Malek Jaziri-a'n 6-1, 2-6, 6-2, 6-4 in a hneh.