FA Cup quarterfinal replay awm dawn lo

English Football Association chuan FA Cup kalphung an thlak dawn a, season thar aṭangin quarterfinal-ah replay a awm tawh dawn lo.

Kum 1999 khan Manchester United chuan FA Cup semifinal-ah Arsenal hnehin an champion zui a, a kum leh aṭangin FA Cup semifinal replay tih bo a ni. Kuminah United-in FA cup nonmawi an chawi a, season thar aṭangin quarterfinal replay thai bo a ni dawn thung.

Quarterfinal hma round-ah te erawh replay a la awm chhunzawm zel dawn - hei hi club tenau tan thu lawmawm a ni. English league hniam lam khel ten Premier League club khelmuala match an neihin Tv deal leh ticket aṭangin an sum lakluh a pung ṭhin a, FA Cup-a replay awm ṭhin hi club tenau tan chuan sum hnar pakhat a ni.

FA chief executive Martin Glenn chuan, "Kan lo kal tawh dan leh FA Cup sulhnu tam takte zah viau mah ila he inelnain hma a sawn zel theih nan leh khawvel football inelna ngaihhlut ber pawl a nihna hi humhim a nih zel theih nan kalphung thar duan a pawimawh si a ni," tiin FA Cup kalphung an thlak chhan a sawi.