NBA Playoffs Warriors an la thi lo e

Champion lai Golden State Warriors chuan NBA Finals khelh an bei-seina thi ṭep tawh an chhem nung leh ta! Nimin zing khan Western Conference Finals Game 5 khelh niin Warriors hian Oklahoma City Thunder lakah 120-111 in hnehna an chang a, Thunder hian series-ah 3-2 in hma an la hruai.

A zawna game hnih an chak loh hnuah Warriors coach Steve Kerr-a'n an beiseina a la tawp loh thu leh an zam loh thu a sawi a, Oracle Arena, Oakland-a fans 19,596 pung khawm hmaah a takin a lantir. Inkhel bul ṭan aṭangin Warriors an fimkhur a, fal takin hma hruai lo mah se quarter thumnaah point liin an hniam zawk tih loh chu quarter dang zawngah a chungnung zawk an nih vek avangin a tawpa an inthlauhna chu point kua a ni.

Warriors tan MVP Stephen Curry-a'n court chhungah minute 37 hun a hman chhungin point 31 a score a, court chhunga hun hmang rei ber (minute 39) Draymond Green chuan point 11 neiin Klay Thompson-a'n point 27 a score bawk.

Game 5-a point score hnem ber chu Kevin Durant niin American power forward hian point 40 zet score-in Thunder player zinga a mah hnaih bertu guard Russell Westbrook chuan point 31 nei mah se an ṭhian ten an thlawp ṭhat loh avangin NBA Finals luh theihna hun ṭha an neih an chhawr ṭangkai thei lo.

Pathianni zing dar 6:30-ah Chesapeake Energy Arena, Oklahoma City-ah Game 6 an khel leh dawn a, Warriors tan an game hnuhnung pahniha an chak lohna hmunah chet sual a thiang tawh dawn lo. Thunder hian hnehna an chang a nih chuan game hnuhnung ber khelh ngai loin NBA Finals an lut nghal tawh dawn. Curry leh a team-te hian hnehna an chang thei a nih hlauh chuan Thawhlehni zingah an khelmual Oracle Arena-a Game 7 an khelh hunah dinhmun ṭha zawkah an ding ang.