Messi leh Djokovic aia hlu zawk Kohli
SportsPro chuan infiamna khawvela sum chet vel dan an zirchian hnuah India test captain Virat Kohli chu khawvel infiammi zinga hlu ber pathumnaah an thlang a, IPL khelh meka player langsar ber ni mek Kohli chung chiahah hian Juventus midfielder Paul Pogba a awm a, pakhatna chu NBA most valuable player Stephen Curry a ni.
World no.1 tennis player Novak Djokovic chuan 23-na dinhmun a hauh pha ṭawk a, football khawvela player langsar ber pawl Lionel Messi chu 27-na niin tlan chak hmingthang Usain Bolt chu 31-na a ni. Indian infiammi zingah Sania Mirza chu top 50 huang chhungah a awm ve bawk.
Kum 2010 aṭang khan Sportspro hian infiammite hlut zawng hi an lo chhut tawh ṭhin a, an tih hmasak ber kum hian NBA star LeBron James chu pakhatna a ni. Kum 2011-ah ‘Sprint King’ tia hminglem an vuah Bolt chu pakhatna a ni a, kumina pariatna dinhmun hauhtu Neymar chu 2012 leh 2013 khan pakhatna lo ni tawh bawk a, 2014 khan Formula One world champion Lewis Hamilton chu a chung berah a awm bawk.
Thlan dan
SportsPro chuan khawvela infiammi hlu ber thlang chhuak tur hian tehna hrang hrang an hman thu an sawi a, an tehfung bera an hman chu kumin nipui
aṭanga kum thum chhunga infiammite hlutna tur a ni. An hlutna hi pawisa, kum, market-a an tlak nat dan, mipui an hip dan, an club khelhna an sawn theih dan aṭang tein an teh.
Hemi awmzia chu Virat Kohli hi a sum lakluh zatte, a hmelṭhatna hmanga fans a ngah theih dan te, Kohli sponsor-tu brand ten Indian batsman an hman an hlawkpui theih dan te, season tharah IPL club dangin an lei ngamna zat tur te, a kum naupan ngaihtuaha hmabak ala ngah dante aṭangin chhut a ni a, heta sum leh larna insuihfin aṭanga enin Kolhi hi khawvel infiammi zingah a hlu ber pathumna a ni tihna a ni.
Kohli faktu Sachin
Virat Kohli-a'n tun season Indian Premier League-ah match 15 khel tawhin run 919 a siam a, Royal Challengers Bangalore-in final an luhna kawnga an player thawhhlawk ber tih ngam a ni.
Cricketer piang tawh zinga ropui bera mi tam takin an ngaih Sachin Tendulkar chuan Kohli hi fakin, "Talent nei ṭha bik a ni a, a thawkrim em em bawk. Mahni a inthununna leh inpekna hi sawi hmaih thiang lo a ni a, boruak sang tak hnuaiah pawh a rilru a huaisen em em reng a ni," tiin Kohli chu a fak.
Kum 27-a upa batsman Kohli pawhin Sachin nena khaikhin a ni ṭhin chu a duh loh thu sawiin, "Dik taka sawi chuan Sachin nena khaikhin nih hi ka duh lo a, amah nena khaikhin tur khawpa ṭha dang an awm lo. Sachin chu khawvela batsman dangte aia danglam bik a ni a, record tam tak siam tura piang a ni. Ram tan kum hnih vel chiah ṭha takin ka la khel a, Sachin chuan kum 24 chhung a ti thei," tiin Sachin nena sawi zawm a duh lo.
IPL final
Pathianni zan dar 8:00-ah Indian Premier League final khelh a ni dawn a, Virat Kohli-a team Royal Challengers Bangalore chu final lut chiang tawh niin an khingpui tur erawh a la hriat loh.
Nizan khan Qualifier 2-ah final luh inchuhin Sunrisers Hyderabad leh Gujarat Lions an inhmachhawn a, he chanchin buatsaih a nih lai hian an result kan hre hman lo - a chak zawk hi final lut tur an ni.
IPL 2016 khelhna tur hi M. Chinnaswamy Stadium, Bengaluru-a ni a, eng team pawhin final lut se mahni muala khel tur Bangalore-in fans an ngah dawn avangin Kohli leh a hote an zam lo ang.