Euro hmaa dam hman inbeisei Schweinsteiger

Germany captain Bastian Schweinsteiger chuan Euro 2016 khelh hmaa a dam hman a inbeisei thu sawiin France-ah chuan hrisel ṭha taka an ram team a ho theih a beisei thu a sawi chhuak.

Kum 31-a upa midfielder chuan, "Hma ka sawn zel a, ka tihturte ka tih zel avangin ngai ka awh leh ṭan tawh a ni. Kum 2014 World Cup hma pawn hliam vangin ka lo buai tawh a, khatih hunlai ai khan tuna ka dinhmun hi a ṭha zawk. Inhliam hi chu a hrehawm a, mah se ka beidawng ve ngai lo," a ti.

Germany manager Joachim Low pawhin a midfielder chungchang hi sawiin, "A theihna zawng zawngin dam
ṭha leh vat turin a bei a, a chang chuan nikhatah vawi thumte training a nei ṭhin," tiin a captain chu a thawhrim thu a sawi.

Pathianni zan dar 9:15-ah Germany hian Slovakia chu friendly match an khelhpui dawn a, defender Mats Hummels chu hliam tenau vangin a inlan thei kher lo mai thei.