Pro Volleyball Anastasia hnehin TNT-in final lut

Mizoram Volleyball Association leh LPS ṭangkawp ten an buatsaih Zothan Auto Works Pro Volleyball League final khel tur a hriat ta. Ningani zan khan TNT chuan an league match hnuhnung berah Anastasia VC, Electric Veng chu 3-1 in an hneh.

League match nga an khelh aṭangin TNT hian point 12 hmuin league table hmahruaitu an ni a, final an lut chiang. Anastasia hi chak lo zawk ni mah se point 10 an neih ve tho avangin pahnihna dinhmun an luah a, final an lut ve tho.

Dengṭhuama Indoor Stadium, Mualpuia inkhelah TNT hian 25-21, 25-20, 19-25, 25-23 in hnehna an chang a, final an luh theih nana player pawimawh Laldensanga chu man of the match atana thlan a ni. Densanga hi 3rd Bn MAP an hneh ṭum pawhin man of the match atan thlan a lo ni tawh nghe nghe.

Nizan khan league round match hnuhnung ber khelh niin 3rd Bn MAP leh Chanmari West SC te an inkhel a, a chak lo zawk team hian season tharah Pro Volleyball League an khel ve thei lo ang.

Team Dinhmun

# Team Pld Set won Set loss Pts

1 TNT 5 12 5 12

2 Anastasia 5 13 7 10

2 Hunthar 5 12 7 10

4 CWSC 4 8 9 5

5 3rd Map 4 7 9 5

6 Hmingi 5 0 15 0