Russia team-ah Sharapova

2012 London Olympic silver medalist Maria Sharapova chu 2016 Rio Olympics khel tur Russia Olympic team-ah telh a ni a, hmeichhe single khel tura tih a ni nghe nghe.

Mahse, tun dinhmun-ah International Tennis Federation (ITF) chuan March 12 aṭang kahn damdawi hman phal loh 'meldonium' a hman avangin Sharapova hi inkhel thei lo turin an hrem mek a, an hrem chin tur hi tih chiah a la ni lo thung. Tunkar chhung hian Sharapova-i'n Rio a pan theih dawn leh dawn loh a chian beisei a ni.

Kum 29-a upa Shara-pova bakah hian Svetlana Kuznetsova, Anastasia Pavliuchenkova leh Darya Kasatkina te chu Russia hmeichhe tennis team-ah hian telh an ni a, Grand Slam vawi nga champion tawh Sharapova hi a inlan an phal lo a nih chuan world number 29 Ekaterina Makarova chuan a hmun ruak a luah ang.

Russian Tennis Fede-ration (RTF) president Shamil Tarpishchev chuan, "Sharapova tan hmun kan siamsak phawt a, tun kartawpah chuan a inkhelh theih dawn leh dawn loh a chian hman beisei a ni. June 6 khi Olympic khel tur puan kim hun a la nih chauh avangin hun ala awmah kan ngai," tiin an hmeichhe player
ṭha ber chungah beiseina an nei mek.

Tun hma zawng chuan meldonium hi infiammite tan hman phal loh a ni ngai lo a, kumin January thla aṭang khan WADA chuan hman phal loh zingah a telh chauh.

January thlaa khelh zawh tak Australian Open-ah khan Sharapova hian he damdawi hi a hmang tih hmuh chhuah a ni a, hei vang hian hrem mek a ni. Mahse, April 13 khan WADA chuan kumin March 1 hmalama he damdawi lo hmangte taksaah he damdawi hi one microgram chin chauh a awm anih chuan hrem loha ngaihhnathiam turin thu a ti chhuak a, Sharapova dinhmun pawh hi a hriat theih thuai dawn a ni.