UCL Final - A hun a thleng ta!
Kum thum chhunga a vawi hnih nan UEFA Champions League final-ah Real Madrid leh Atletico Madrid te an intawng dawn a, zanin dar 12:15 hi San Siro-a Madrid khaw club pahnih intawn hun chu a ni. Ten Action-ah khawvel nghahhlelh inkhel hmuhnawm hi a en theih ang.
A chhehvel
Kumin FA Cup final-a referee Mark Clattenburg chu final kaihruai tur a ni a, English referee hi UEFA European Championship-ah a hmel kan hmu bawk ang.
San Siro-a mipui leng zat chu 71,500 a ni a, inkhel en man hi chi hrang paliah ṭhen hran a ni. En man to ber hi €440 (Rs 33,026) niin €320 (Rs 24,019), €160 (Rs 12,009) leh €70 (Rs 5,254) man te a awm bawk.
Thu a tawk lo
Atletico Madrid coach Diego Simeone chuan, "Duhthusam sawi vang hian a tak a thleng dawn tihna a ni lo a, tun hunah kan chen a ngai. Chak tumin kan inpuahchah ngei a, amaherawhchu thawhrimna hmang chauhin kan thil duh hi kan sual chhuak thei a ni," tiin thu ringawt a tawk loh thu a sawi.
Atletico boss chuan Lisbon-a final an khelh ṭum leh tun ṭuma mi hi chu a dang tih a sawi a, chu-vangin tun ṭum bik kan thlir ang.
Field sir : Atletico-in a laiah player an hnawh a, field sir lam a phui tawk ṭhin lo. Real midfielder pahnih Luka Modric leh Toni Kroos te hi player fing bik an ni a, wing back Marcelo leh Dani Carvajal ten goal an nawr pui tawh chuan Ronaldo leh Bale te pet goal turin a laiah an lut thei ang. Simeone tan fimkhur ṭulnma lai tur a ni.
Atletico counter : Atletico hian a hlauhawm lo chinah chuan an khingpuite ball chantir pawi an ti lo a, nawr let thut chu an thiam dan a ni. Chumi kawngah chuan Koke leh Saul chu ven uluk ngai an ni a, an ball pekna ber Antoine Griezmann chu player hlauawm ber a ni lawi si. Real defensive midfielder Casemiro-a'n uluk takin player ven tur a thlan thiam a ṭul ang.
Torres vs Ramos : Spain-in sirah hnawlin Atletico hma-tawnga hriam ber chu Griezmann ni mah se Fernando Torres hi theihngilh suh. Liverpool tana player ropui hian a club hmangaih Atletico tan Spain boss Vicente del Bosque inchhirna tur khawpin a la inlan thei ang. Spain striker ṭha ber lo ni tawh ṭhin Torres hi Sergio Ramos-a'n a ven uluk a ṭul ang.
Set Piece : Atletico-in corner an hmuh chuan Diego Godin a hlauhawm a, 2014 final-a goal an khung hmasak dan pawh a ni. Real lamin Ronaldo an neih bawk avangin mahni lamah chuan awmze nei lo foul chawi emaw corner pek emaw a hlauhawm ang.
Vawi 1-na vs 11-na?
Atletico Madrid hian kum 1974 leh 2014 khan final an lo lut tawh a, an chak lo ve ve. Tun ṭumah hian final kalkawngah champion tura rinkai ni pha Barcelona leh Bayern Munich an hneh thei a, champion an phu. Mahse Luis Enrique leh Pep Guardiola naute hnehtu Diego Simeone hote hian Zinedine Zidane-a kaihhruai team an hneh ngei dawn tihna a ni lo a, an chak erawh chuan Atletico-in an club history-a a vawi khat nan nomawi an chawi ang.
Zidane tan Champions League final a thlen vawi khatnaa champion nghal hi duhthusam a ni dawn a, vawi 10 champion tawh Real Madrid enkawltu a nih avangin pressure a tam dawn. Zidane chuan, "Boruak a sang dawn a, mah se pressure awm ngei hi ka duh dan chu a ni. Mi zawng zawngin final khelh an châk a, kei erawhin ka khel ve dawn lo (nui chungin). Dawhtheihna leh tumruhna nen nomawi chawi ngei kan tum ang," tiin final chungchang a sawi.
UCL Final Kalkawng
Real Madrid
GROUPSTAGE
Real 4-0 Shakhtar
Malmo FF 0-2 Real
PSG 0-0 Real
Real 1-0 PSG
Shakhtar 3-4 Real
Real 8-0 Malmo FF
* Real hi Group A hmahruaitu an ni
Opponent 1st leg 2nd leg
LAST 16
Roma 0-2 Real
Real 2-0 Real
* Agg-ah Real 4-0 in an chak
QUARTERFINAL
Wolfsburg 2-0 Real
Real 3-0 Wolfsburg
* Agg-ah Real 3-2 in an chak
SEMIFINAL
Man City 0-0 Real
Real 1-0 Man City
* Agg-ah Real 1-0 in an chak
Atletico Madrid
GROUPSTAGE
Galatasaray 0-2 Atletico
Atletico 1-2 Benfica
Atletico 4-0 Astana
Astana 0–0 Atletico
Atletico 2-0 Galatasaray
Benfica 1-2 Atletico
* Atletico hi Group C hmahruaitu an ni
LAST 16
PSV 0-0 Atletico
Atletico 0-0 PSV
*Penalty-ah Atletico 8-7 in an chak
QUARTERFINAL
Barcelona 2-1 Atletico
Atletico 2-0 Barcelona
* Agg-ah Atletico 3-2 in an chak
SEMIFINAL
Atletico 1-0 Bayern
Bayern 2-1 Atletico
* Away Goal Rule hmangin Atletico an chak