Zinedine Zidane Vs Diego Simeone

Ball kang lai chu Zinedine Zidane ke vei lam nena intawngin goal len a puar zui nghal pawp. Kum 14 liam taa Hampden Park, Glasgow-a Real Madrid-in Champions League nomawi an chawi theihna goal kha, a thlir hnai bertu Bayer Leverkusen midfielder Michael Ballack aṭanga TV hmanga entu thlengin ropui an ti tlang. Los Blancos-in a hun laia (kum 2001) player man to ber ni tura an lakluh Zidane hian 1998 FIFA World Cup-ah an ram France a lo champion pui tawh avangin a man hi a phu a, goal mawi leh pawimawh a khung fo pawh a mak lo - football khel tura piang a ni.

Khawvelin an sawi vul Brazil striker Ronaldo hliah khuh nan Zidane-a'n World Cup nomawi a chawi a, he inelnaah hian Real-in Galacticos hming a put chhan pakhat David Beckham chu ball pet thiam vang leh hmelṭhat vangin a lar viau bawk. Amaherawhchu England star ni zui mai tur midfielder hian amah aia fing leh rorum khelmualah a tawn avangin 98 World Cup an tlak chhanah English mipuiin Beckham an kawh rawn. England pet chhuaktu Argentina captain kha Diego Simeone a ni a, he pa tho hi Beckham aia fing leh zanina Zidane-a hmachhawn tur chu a ni.

An hun laiin Simeone hi khawvel team ṭha bera khel tlak a ni nachungin player ṭha sawm thlan chhuah tur ni se a hming lam teltu chuan inkhelh thiam hre lo tiin an dem rawn si ang. Zidane erawh a vanglai chuan 'ber' zinga mi a ni a, football mawina tifamkimtu tia faktu an awm a nih pawhin a sawitu hian a thusawi ṭawmpuitu ṭhahnem tak a nei ngei ang.

French pa fing leh Argentine pa rorum te hi thluak hmangin an inbei dawn a, khelmual chunga Zidane-a chungnung zawknate phuar beh a ni tawh avangin coaching lamah chuan Simeone hi loh theih loha dan san tur chu a ni. Chutihrualin Real lamin Zidane-a hman theih turin pound maktaduai 80 chuang man Cristiano Ronaldo leh Gareth Bale bakah player man to tam tak an chhawp sak laiin Simeone-a'n khawvel player ṭha pathum zingah a tel phak a tih 'Antoine Griezmann' chu pound maktaduai 24 man chauh (Real man aṭanga thlirin) a ni thung. Player neih ṭhat zawk vang liau liauin Zidane hote hi rinkai zawk an ni a, an chak zawk a nih phei chuan coaching lamah Simeone aia dah sangtu an awm ang - Argentine pa hnathawh hre tan chuan hei erawh pawm harsa ava ni dawn em!

Rafael Benitez hnuaia Real talbuai chhan chhuak turin kumin kumtir khan Zidane a rawn pen chhuak a, player talent nei ṭha mah se khelmual chhunga an tih tur hlen zo lo James Rodriguez leh Isco te bench-a a ṭhuttir ngam vangin fak a hlawh a. Real hi goal khung kawngah hma lam an pan bakah bakah goal venhim kawngah hma an sawn bawk. Real thiampuipa Ronaldo chuan, "Player a nihna angin ka ngaisang a, tunah chuan kan chunga a chet dan avangin coach a nihna ang pawhin ka dah sang a ni. Amah hi Real Madrid enkawl reng tura ka duh chu a ni," tiin France legend a fak a, Zidane-a tan fakna rimawi tih loh phal chi a ni lo.

La Liga-a Real pahnihna leh Champions League final thlenpuitu kum 43-a upa Zidane hian hmalam êng tak nei mah se kum 46-a upa Simeone hlawhtlinna tem pha turin hmabak a la ngah hle. Argentine manager hian Argentine Primera División-ah an ram club Estudiantes de La Plata leh River Plate te a champion pui tawh a, kum 2011-a Atletico a zawm hnu pawh hian a record a chhuanawm tawh hle.

Simeone hi Real leh Barcelona ropui laia Spanish club zawm ni mah se Atletico hi La Liga, Copa del Rey leh Supercopa de Espana-ah te vawi khat ṭheuh a champion pui tawh bakah UEFA Europa League leh UEFA Super Cup-ah nomawi chawi pui tawh bawkin hmachhawp a nei a nih chuan Champions League hi a ni ngei ang.

A khingpui tur Zidane pawhin, "Simeone hian coach in a neih tur ang zawng zawng a nei vek a, hemi belhchhahna tur hian a player-te a hrechiang em em a ni. Amah hi khawvel coach ṭha ber zinga mi a ni. Kei erawh zir tur tam tak ka nei a, coach ṭha zawk nih châka ka tuihal avangin hma ka sawn zel ang. Coach ropui ni turin hmabak ka la ngah hle," tiin coaching lamah Simeone a la tluk lo tih a pawm thlap.