French Open-ah Ivanovic chak ve zel

2008 French Open champion Ana Ivanovic chuan a lo ropui tawhna ṭhin hmunah hlawhtlin leh ngei tumin thapui a thawh mek! Ningani khan Kurumi Nara lakah hnehna changin third round a inhlangkai a, inkhel dangah Serena Williams chuan Teliana Pereira a lo sawp ve bawk.

Paris-a inkhelah seeded 14-na Ivanovic hian Japan nula Nara lakah hian 7-5, 6-1 in hnehna a chang. Player pahnihte hi tun hmain vawi khat an lo inhmachhawn tawh a, nikum khan Auckland-ah Ana hian 6-2, 6-3 in hnehna a lo chang tawh bawk.

Serbian nula Ivanovic hi khaw-vela hmeichhe player beisei awm ber pawl a ni a, kum 2008 khen Australian Open leh French Open final a thleng. Mahse, beisei ang a ṭha tluantling ta loin Grand Slam inelnaah final a lut leh tawh lo. A hnampui Novak Djokovic erawhin mipa lamah ro a rel mek thung.

Kum 28-a upa Ivanovic chuan, "Inkhel bul ṭan aṭanga a point hnuhnung ber hmuh a ngaih thleng khan inthlahdah theih lai a awm lo a, rilru bakah taksa a hah hle. Ka forehand kha a ṭhat ṭhin avangin inrintawkna min siam a, he hmunah hi chuan nuamti takin ka inkhel thei ṭhin a ni," tiin major tournament a champion hmasak berna leh awmchhun la ni bawk nuam a tih thu a sawi.

World number 1 Serena pawhin harsa lo takin second round a paltlang a, champion lai hian darkar khat leh minute khat chhung lekin seeded pawh chang phak lo Pereira chu 6-2, 6-1 in a hneh. Grand Slam vawi 21 champion tawh Serena hi French Open bikah hian ṭum thum a champion tawh nghe nghe.

American thiampuinu Serena bakah a unaunu Venus Williams, Timea Bacsinszky leh Carla Suarez Navarro te chuan hmeichhe single third round an lut ve bawk.