England squad-ah Delph tan hmun a awm lo

Manchester City mid-fielder Fabian Delph chu ṭhal na vangin nizana England leh Australia ten Stadium of Light-a friendly match an khelh ṭumin a tel ve lo a, Euro 2016 khel tur England squad aṭanga paih a nih tur thu manager Roy Hodgson chuan a sawi.

England manager chuan, "Kan zingah Delph a tel lo. Tunah hian Manchester-ah a awm mek a, England squad-a player 23 zingah a tel dawn lo tihna a ni," tiin player 26 aṭanga pathum paih leh turah Delph a chian tawh thu a sawi lang.

Delph hian Aston Villa aṭanga Manchester City a pan hnuah beisei a phak lo a, hliam vanga a talbuai fo bawk avangin season hman zawh takah khan City tan inelna hrang hrangah match 30 chiah a khel thei a ni.

Liverpool forward Daniel Sturridge chuan hliam vangin ni hnih chhung England team training a zawm tawh lo bawk a, season hman zawh taka goal 13 khungtu striker hian England squad-a hmun chang ngei turin a indah thei tawh lo ang.