Inkhelh zel tum Kuyt

Kum 35-a upa Dirk Kuyt chuan inkhelh chawlhsan lam a la ngaihtuah lo tih tilangin a khelh mekna Feyenoord-ah kum khat dang cham turin contract thar a ziak.

Netherlands tan vawi 104 a inlana goal 24 khungtu Kuyt hian Liverpool leh Fenerbahce lama hun a hman hnuin nikum khan a club hlui Feyenoord lam hi a pan a, season duhawm tak hmangin inelna hrang hrangah goal 23 lai a la khung thei.

Season hman zawh taka Dutch Cup-a Feyenoord champion puitu forward chuan, "He club-ah season khat dang ka cham thei tur hi ka lawm hle a ni. Nomawi chawi chunga season kan khar avangin a dang duh belhna thinlung kan nei a, season tharah pawh nomawi kan chawi ngei ka beisei," a ti.

Feyenoord technical director Martin van Geel chuan, "Dirk hian season tharah he club tan hmun pawimawh tak a chang leh dawn a, ani ang hruaitu ṭhain he club-a khelh zel a thlang hi a lawmawm takzet a ni," tiin Kuyt an chelh thei chu a lawm thu a sawi.