French Open Djokovic a khel tha, Nadal a vanduai

French Open khelh mekah a vawi khat nana champion tum Novak Djokovic-a'n harsatna lian tham a la tawk lo. Inrinnni khan world number 1 hian Aljaz Bedene chu 6-2, 6-3, 6-3 a hnehin third round a paltlang. Rafael Nadal erawh a ban rek na vangin third round inkhelh hmain a inhnukdawk thung.

Court Philippe Chatrier-a inkhelah Djokovic hian darkar hnih chuang deuhah vawi nga ace a siam hman a, nuamsa takin hnehna a chang. Djokovic hi French Open-ah hian vawi 10 a inlanna niin kuminah hian match thum a khelh tawh aṭangin set a la hloh miah lo a ni.

World number 2 Andy Mur-ray pawhin Ivo Karlovic chu 6-1, 6-4, 7-6 in a hneh a, last 16 a inhlangkai ve bawk. Britain number 1 Murray hian a match hmasa pahnihah set nga a khelh ve ve avangin beisei a phak lo dawn niin a lang a, mah se tunah erawh a theihna tak tak a phochhuak leh ta. Nizan khan Murray hian John Isner a hmachhawn leh a, inkhel result kan hre hman lo.

American tennis player Isner hian darkar thum leh minute sarih chhungin Tey-muraz Gabashvili chu 7-6, 4-6, 2-6, 6-4, 6-2 in a hneh. Feet 6 leh inches 10 zeta sang Isner hian a service ṭhat a chak pui zel niin a lang a, kumin French Open match thum a khelh tawh aṭangin ace vawi 92 zet a siam tawh a, player dangten an tluk lo hle.

Nadal hun a tawp

French Open vawi kaw champion tawh Rafael Nadal chu a ban rek na vangin third round an khelh hmain a inhnukdawk a, a hliam vanga a chawlh hun chhung tur erawh hriat a la ni lo.

Garnd Slam vawi 14 cham-pion tawh Nadal hian major tournament-a match 200 hnehna a channa ni turin second round-ah Facundo Bagnis chu straight set-in a lo hneh tawh a, kumin Roland Garros-ah hian match hnih a khelh aṭanga game kua chiah a hloh avangin champion tura beisei awm ber pawl a ni leh hman. Mahse, beisei angin thil a kaltluang ta lo thung.

Kum 29-a upa Nadal hian Grand Slam match 230 a khelh tawh aṭangin vawi 200 hnehna a chang thei a, clay court tournament bikah chuan record nei ṭha ber niin match 399 a khelh aṭangin vawi 365 ngawt hnehna a chang thei a ni.

Spanish tlangval Nadal hian French Open bikah match 72 a khelh aṭangin vawi hnih chiah chak loh a la nei a, player dang ten a record hi an tluk lo hle. Grand Slam pali belhkhawm chuan Roger Federer-a'n vawi 302 hnehna chang tawhin pakhatna dinhmun a la luah a, world number 1 Novak Djo-kovic chuan match 217 hnehna a chang tawh bawk.

Thuthar thehdarutute hmaah Nadal chuan, "Bagnis nen kan inkhelh dawn ṭum khan chiu ka ngai a, a tukah kha chuan ka banrek kha a lo na zualin ka chet pui hleithei lo," tiin a inhnuhdawh chhan a sawi.

June 27 aṭanga khelh tur Wimbledon chungchang sawi chhunzawmin, "Wimbledon-a inlan thei ngei turin ka inenkawl dawn a, harsatna dang a thleng a nih loh chuan dam hman ngei pawh ka duh," a ti.

Nadal hian French Open vawi 10 champion thei hmasa ber nih a châk vanga a hliam hai der chunga inkhel luih a nih thu a sawi tel bawk.