NBA Playoffs Thunder chelhtu Thompson

NBA Western Conference Finals Game 6 inkhelah shooting guard Klay Thomp-son-a point 41 score hmangin Golden State Warriors chuan Pathianni zing khan Oklahoma City Thunder 108-101 in an hneh. Best of seven series-ah 3-3 chiah niin an intluk tawk mek a, Thawhlehni zing dar 6:30 khian Oracle Arena, Oakland-ah NBA Final lut tur zawk chinfel a ni ang.

Chesapeake Energy Arena-a inkhel-ah Thomson hian three-point vawi 11 zet vawm lutin NBA playoff record thar a siam a, MVP Stephen Curry-a'n point 29 a score bakah rebound vawi 10 leh assists vawi kua nei bawkin triple double a nei teuh hle.

Game 6 inkhelah hian mualneitu Thunder-in inkhel an thunun zawk a, quarter hmasa pathumah a chungnung zawk an ni. Mahse, a hun takah Thomson leh Curry rawn inlarin minute thum pawh khelh tur a awm tawh lo tihah Warriors-in an lehthal!

Champion lai Golden State Warriors hian regular season-ah vawi 73 ngawt hnehna changin NBA chanchina regular season khat chhunga hnehna chang tam thei ber record siam mah se Western Conference Finals-ah Thunder lakah an talbuai hman hle a, OKC hian 3-1 in hma an hruai hman hial! Mahse, an inkhelh hnuhnung pahnihah Warriors hian hnehna an chan let ve leh tak avangin NBA Finals luh an beisei sang leh tawh hle.

Cavaliers an tlang

Inrinni zinga Eastern Conference Finals inkhelah Cleveland Cavaliers chuan LeBron James-a point 33 score hmangin Toronto Raptors 113-87 in an hneh a, a zawna a vawi hnih nan NBA Finals an inhlangkai.

Cavaliers hian first half-ah point 14 in hma an hruai fal hman a, third quarter-a an san fal lai bera an inthlauhna chu point 21 ni hialin a tawp thlengin an chungnung tluan thei a ni.

American power forward LeBron James hian Miami Heat chu NBA Finals vawi li ngawt NBA Finals a lo thlen pui tawh a, tun hi a zawna vawi ruk final a thlenna a ni. Kuminah hian Golden State Warriors leh Oklahoma City Thunder te inkhela chak zawk zawk an hmachhawn ang.

MVP vawi li ngawt ni tawh James chuan, "Inkhel hautak tak a ni dawn tih ka hre lawk a, kan khingpuite chhaih buai tur leh hneh tur chuan na taka ka nawr a ṭul tih pawh ka hria. Inrintawkna kan neih miau avangin kan tum ram hmasa chu kan thleng phawt," tiin a sawi.