A hming chu Marcus Rashford
England manager Roy Hodgson-a'n player pathum paih leh turin Euro 2016 khel thei tur player 26 hming a tar chhuak a, Manchester United rawlthar Marcus Rashford chu France ram zin tur zingah a tel phak beisei a ni lo.
Zirtawpni zanah England-in Stadium of Light-ah Australia chu friendly match-ah 2-1 in an hneh a, he inkhel a zawh meuh chuan Rashford hi an hruai lo a nih chuan mak tih a hlawh tawh ang.
England jersey nen
Rashford-a'n a vawi khat nan England senior team tan a inlan a, second 138-na lekah goal a khung nghal. Manchester United rawlthar hian England tana vawi khat inlanna a goal khung nghal thei naupang ber record a siam a, kum 18 leh ni 208-a upa Rashford hian 1938 daih tawh a Tommy Lawton-a record siam chu a khum.
England tana goal khung thei naupang ber erawh Wayne Rooney a ni chhunzawm zel a, United captain hian kum 17 leh ni 317 upa a nihin Macedonia lamah a khung a, Rashford hian Michael Owen (Kum 18 leh ni 164) a tluk pha lo bawk.
Rashford hian striker ṭha bikte khung dan turin a volley lut a, minute 55-naa Wayne Rooney goal khungna kawngah a inrawlh bawk. United rawlthar hi man of the match-ah thlan a ni a, minute 63-naa Ross Barkley-a'n a rawn thlak pawhin 'standing ovation' pek a ni hial.
Euro 2016 squad tih chian hun hi May 31 a ni a, Roy Hodgson-a'n tlarhma lamah player che ṭha tluang an ngah avangin inhliam vanga Australia hmachhawn thei lo Daniel Sturridge hmalam hun a chiang lo.
Tlarhnung buai
Asia khawmualpuiah Australia ropui mah se khawvel ang chuan team naran an ni. Socceroos lakah England tlarhnung a buai a, Eric Dier-a'n minute 73-naah Chris Smalling a thlak a, minute hnih hnuah Tottenham player hian an lamah a ti goal.
Defence laia Tottenham defensive midfielder Dier enchhin a nih hma pawhin England tlarhnung a phui lo a, Chelsea defender Gary Cahill a inhliam bawk avangin Hodgson-a'n goal venhim lam a ngaihtuah nasat a ṭul ang.
England hian June 2 zan khian Portugal nen friendly match an khel leh ang a, hemi hunah chuan France rama zin tur a chiang tawh ang.