Premier League-ah Hull City an kir

Hull City tan season thara Premier League khel turin Mo-hamed Diame goal ropui a tawk - Inrinni zan khan Championship playoff final-ah Hull City hian 1-0 in Sheffield Wednesday an hneh a, season tharah Premier League-ah an hmel kan hmu ang.

Steve Bruce-a enkawl Hull City-in inkhel an thunun a, first half-ah Diame goal shot chuan post a per. Minute 72-naah erawh Senegal international hi dan theih a ni lo. Robert Snodgrass-a ball siamsak chu West Ham midfielder hlui hian yard 25 vela hla aṭangin a pet a, Sheffield keeper Keiren Westwood-a tan ban phak rual a ni lo.

Diame-a'n tun season-a a goal 10-na a khung hi a goal khung tawh azawnga hlu ber a ni hial mai thei - Hull City hian Premier League an khelh dawn avangin a tlem berah pound maktaduai 170 tal an dawng ang.

Sheffield Wednesday hi hun ṭha nei lo tawp an ni bik lo - hun pek belha Jeremy Helan goal shot chu Hull captain Michael Dawson-a'n a kutin a khawih ngei niin lang mah se referee-in penalty a pe tlat lo.

Nikuma Premier League aṭanga tla thla team pahnihin Championship-ah season khat bak hun an hmang hman lo tihin Premier League-ah an kir lehnghal a, heng team pahnih hi Burnley leh Hull City-te hi an ni.

Hull zinkawng

Manchester United captain hlui Steve Bruce-a enkawl Hull hian Championship-ah palina nichungin season an khar a, Championship playoff an khelh a ngaih phah.

Semifinal-ah Derby nen inhmachhawnin inkhel pahnih belhkhawmah 3-2 in an chak a, final-ah league-a point kua laia an hnuaia awm parukna Sheffield Wednesday an hmachhawn.

Inkhel ṭan tir lamah Wednes-day-in freekick aṭanga Hull goalkeeper Eldin Jakupovic vawi hnih lai an enchhin hnuah Hull an harh a, an hawikir tawh lo. Diame-a'n post a pet per bakah Abel Hernandez ball tauh chu line aṭangin pet chhuah a ni a, Moses Odubajo leh Dawson-te pet goal ngei tur nia lang chu Westwood-a'n ṭha takin a dan sak bawk.

Eng nge an sawi?

Hull City manager Steve Bruce chuan, "Goal ropui tak kan khung a, khatiang goal kha chuan cup final a ti hlu zual
ṭhin. Chance kan neih zozai kha kan thlir chuan chak kan phu a ni. Season tharah kan theihna zawng zawnga kan khelh a
ṭul dawn a, kan budget thlir ran chungin sum kan hmang ang," tiin season thar a thlir nghal der.

Sheffield Wednesday head coach Carlos Carvalhal chuan, "Hull khan keini aiin an khel
ṭha zawk a, chak zawk nih kha an phu a ni. Kha aia ṭha zawka khel thei kha kan ni a, kan theihtawp kan chhuah chungin goal ropui bikin inkhel a thlak danglam ta vek a ni. Players tawnhriat ngah tawh tak tak kan kawl a, mah se kan theihna angin kan khel chhuak lo a ni," tiin an chak lohnaah anmahni thiam loh a nih thu a sawi.

Bruce a chiang lo?

Season thar atan an inbuat-saih tur thu a sawi hnu lawkah Steve Bruce-a'n Hull City-a a hmalam hun chu a ngaihtuah
ṭhat tur thu a sawi.

Kum 55-a upa manager chuan, "Club neitute nen kan titi phawt a ngai ang. Premier League kalsan zawnga chet chu a mawi lo mai thei a, he league hi ka awm duhna chu a ni. Mahse, he club-in hmachhawp a neihte chiang taka hrilh hriat nih ka duh a, he club hi hralh a ni dawn tih mi tam tam takin an sawi avangin enge thleng dawn tih hi kan ngaih chan phawt a ṭul a ni," a ti.

Hull neitu Assem Allam-a'n club hming Hull Tigers tia thlak a dilna Football Association-in an hnar sak hnuah Egyptian sumdawng hausa hian a club hi a zuar a, May thla tir khan Hull lei duhtute nen an indawr thu a sawi.