Busquets a rinawm

Sergio Busquets chuan Barcelona-ah kum nga dang cham chhunzawm leh turin contract thar a ziak a, a khelh ṭhat dan a zirin kum 2023 thleng Nou Camp-a cham turin contract hi pawh sei leh theih a ni ang.

Spain international Busquets hian kum 2008 khan Catalan club tana a match hmasa ber a khel a, La Liga champion tan hian inelna hrang hrangah match 384 khelh chhunzawm tawhin goal 12 a khung tawh a, a goal khung aiin field chhunga game kaihhruaitu a nihna hian fak a hlawh zawk. A contract thara a lan dan-in amahin a duh a nih a, club dangin Barca phal lo chunga an lei chhuah theihna zat chu pound maktaduai 152 a ni a, Catalan club hian chhuahtir an tum lo tih a chiang hle.

Kum 27-a upa Bus-quets hian Barcelona tan champion nomawi 23 zet a chawi tawh a, heng zingah hian Champions League nomawi pathum a tel nghe nghe.

Contract thar a ziah vanga a lawmthu sawiin, "He hmunah hian zir tur tam tak nei chungin ka lo kal a, tunah chuan player puitling ka ni tawh. Barcelona hi khawvela club ṭha ber a nih avangin he hmuna ka cham chhunzawm thei tur hi ka lawm a, ka taksa a hrisel
ṭhat bawk avangin ṭhiante tana ṭangkai nih theih zel ka tum ang," tiin a sawi.