Belgium tan Lukaku leh De Bruyne

Inrinni zan khan Euro 2016 inpuahchah nan Switzerland leh Belgium-te chuan friendly match an khel a, he inkhelah hian si phur hmasa zawk Belgium chuan 2-1 a hnehna changin France kal turin an inpuahchah ṭha hle.

Stade de Geneve-a inkhelah mualneitu team-in minute 31-na lekah Blerim Dzemaili hmangin goal hmahruai an khung a, an hlim chhung erawh a rei lo. Goal an chhuah aṭanga minute thum hnu lekah Belgium tan Romelu Lukaku chuan si phurh sutna goal a khung.

Team pahnih hi inhneh-tawk viau mah se Swiss striker Haris Seferovic chu minute 81-naah hnawh-chhuah a ni a, minute kua la bang zawng chu Belgium ta a ni tawh. Player kim loa Switzerland an khelh aṭanga minute 2-na lekah Kevin De Bruyne chuan Belgium chakna goal hi a khung a ni.

Switzerland tan an pla-yer langsar ber chu goalkeeper Yann Sommer a ni a, Bundes-liga lama Borussia Monchengladbach keeper hian Romelu Lukaku, De Bruyne leh Divock Origi-te ball pet chu ṭha tak takin a dan sak.

Marc Wilmots-a en-kawl Belgium-in Euro ṭan hma an match hnuhnung parukah hnehna an chang fai vek a, Nilainia Finland hmachhawn leh tur ram hian inrintawkna nasa tak nen France an pan ang.

Hetihlai hian Moldova nena friendly match la khel leh tur Switzerland erawh an match hnuhnung pathumah an la chak lo fai vek a, inrintawkna nena France pan turin Moldova laka an insiam-
ṭhat a pawimawh dawn.