Europe-a club ropui ber Rea11

Cristiano Ronaldo-a'n La Liga history-a keeper man to ber Jan Oblak chu penalty-ah chiang taka bumin a vawi 11 nan Real Madrid chu European Champion an ni.

Inrinni zan inkhel hi UEFA Champions League final a nih avangin a ropui a, Madrid Derby a nih avangin beisei a sang a, chutih rualin kum thum chhunga an vawi hnih intawnna a nih avangin fimkhur luatah attacking football hmuh loh theih a ni. Amaherawhchu Real Madrid-in minute 15-na lekah Sergio Ramos-a goal hmangin hma an hruai a, Atletico Madrid tan defensive game khawng tak khelhin awmzia a nei lo.

Diego Simeone hoten goal khung tumin an nawr let a, Atletico striker Antoine Griezmann-a penalty hlah vanga beidawng duh loin an bei zel a, Yannick Carrasco hmangin minute 79-naah an sut. Extra time thleng goal hmuh tur awm lo mah se inkhel hmuhnawmna a tlahniam lo a, penalty shootout-ah tawnhriat ngah zawk Real chu 5-3 in an vannei a, Los Blancos leh Zinedine Zidane-a ropuina belhchhahin a awm.

Midfield-ah Casemiro

Zinedine Zidane-a inkhelh hunlaiin Claudio Makelele chuan Real Madrid-ah French legend tan hna harsa zawng zawng a thawhsak niin an sawi ṭhin a, midfielder thawkrim Makelele hi langsar vut lo mah se team chakna thahrui a ni. Real Madrid president Florentino Perez thlirna aṭang chuan 2014 FIFA World Cup golden boot dawngtu James Rodriguez chu starting eleven chang tur a ni thei a, amaherawhchu manager Zidane-a'n team ṭhatna turah ngaiin Casemiro a luhtir a, Brazilian defensive midfielder ṭangkaizia chu inkhel entu tan hmuh hmaih a thiang lo.

Real Madrid starting eleven-a inlante chu Navas, Carvajal, Ramos, Pepe, Marcelo, Kroos, Modric, Casemiro, Ronaldo, Bale leh Benzema-te an ni.

Final-ah Savic

Manchester City-in ṭha tawk loa an ngaih Stefan Savic chu Diego Simeone-a'n final khel turin a ringtawk. Montenegrin international hi Diego Godin kawppui turin Bayern Munich an hneh ṭuma khel ṭha tawk lo Jose María Giménez aiah luhtir a ni.

Atletico Madrid tana bul ṭantute chu Oblak, Juanfran, Godín, Savic, Luis, Saúl, Augusto, Gabi, Koke, Griezmann leh Torres te an ni.

Atletico ṭhatna set piece?

Final khelh hmain set piece-in inkhelh a tih danglam theih thu sawi a ni a, Atletico tan hmanraw ṭha tak a nih tur thu sawi tel a ni bawk. San Siro-ah Real Madrid zawkin set piece an hmang ṭangkai a, Atletico lamin ṭul lo takin ball pet thiam Toni Kroos leh Ronaldo awmna Real lakah ho lam takin freekick an chawi ngun a, an veng zui ṭha tawk lo bawk.

Inkhelh ṭan phatah Bale-a'n a freekick hlawhchhuah chu pet nghalin Casemiro-a'n yard thum vel lek aṭangin a khung lo a, Jan Oblak-a'n Brazilian midfielder goal khung tur hi a dang ṭha hle. Minute 15-naah Juanfran-a'n ṭul lo takin freekick a chawi a, Kroos-a ball pet chu Bale-a'n tauh pialin Ramos-a'n goal hmahruai a khung. Real captain hi a offside ngei niin a lang a, chutihrualin a tharum ngahna hmanga Savic venna aṭanga a tal put thei erawh a fakawm thlawt.

Hun tawp dawn thlengin Atletico hian set piece ven kawngah harsatna an tawk a, Ronaldo-a'n corner aṭangin tauh goal-na remchang hmu mah se amah ang lo takin extra time-a a hun ṭha hmuh chu a bawhpelh.

First half-ah Los Blancos-in inkhel an thunun a, Real goalkeeper Keylor Navas tan hna harsa a awm lo. Atletico inchhuanna Fernando Torres, Griezmann leh Saúl te'n beisei an pha lo a, 2016 Euro khel tura Spain tana koh loh Torres-a'n minute 45 chhungin pass dik a nei lo.

Chhinchhiah tlak Carrasco

Goal mamawh vangin Diego Simeone-a'n inkhel thlak danglam nan Bayern Munich an khelh ṭuma a tih dan ang thoin Augusto aiah Belgian winger Yannick Carrasco a luhtir a, substitution awmze nei a ni.

Atletico-in goal an nawr nat zarah penalty an hlawh a, Pepe laka Torres-a penalty hmuh chu Griezmann-a'n crossbar pet per nan a hmang a, Real an him hram. Zidane-a'n loh theih loin right back Dani Carvajal inhliam vangin Danilo a luhtir a, euro maktaduai 31.5 man defender hi Carrasco-a'n a chhaih buai hneh hle.

Goal hmaah Atletico an hlauhawm a, Savic-a'n an siphurh a sut teuh a, Barcelona an hneh ṭuma chhandamtu Saul-a'n goal a khung thei bik lo. Counter attack-ah Real an hlauhawm ve reng a, Luka Modric-a ball fing tak chu Benzema-a'n keeper Oblak chiah ah hmachhawn chungin a pet goal thei lo.

Real-in goal khat chauhin hma hruai mah se Zidane-a'n substitution hman zawh pawi a ti lo. German midfielder Kroos aiah Isco a inlan a, Benzema aiah winger tlan chak Lucas Vázquez hmel kan hmu bawk. French legend hian Ronaldo ropui theih nan substitution a siam niin a lang a, amaherawhchu scoresheet-a hming lang zawk erawh Yannick Ferreira Carrasco a ni.

Kum 22-a upa Carrasco hian minute 11 chiah a awm tawh tihin Juanfran-a volley-cross ṭha zet chu chiang takin a tlawh lut a, Belgian winger hian goal pawimawh hi sial takin a lawm a, mipui sing riat chuang lenna stadium San Siro-ah a ṭhiannu awmna hrilh nawn a ngai lo.

Goal dang a luh loh avangin 2014 Champions League final ang thoin extra time khelh a ni a, minute 90 chhung an thawhrim tlan avangin player tinte an chau tih a chiang hle. Atletico-in inhliam vangin Filipe Luís leh Koke te aiah Lucas Hernández leh Thomas Partey te an luhtir a, extra time-ah hian set piece-a chungnung zawk Real dinhmun a ṭha hret.

Vei lam leh ding lam

Penalty shootout hmanga chak zawk zawn a ngai a, Real tana pet hmasa bertu Lucas Vázquez leh a hnung zuitu Marcelo, Gareth Bale leh Sergio Ramos ten dinglamah pet vekin Jan Oblak-a'n dan theih pakhatmah a nei lo.

Atletico lam tan hun pangngaia pet goal lotu Griezmann-a'n bul ṭanin keeper vei lamah cool takin a rawn khung a, captain khel ṭha Gabi leh Saúl Ñíguez ten vei lamah chiang takin an rawn khung ve bawk. Amaherawhchu Juanfran-a'n a teammate-te petna lamah tho pet ve mah se Real keeper Keylor Navas-a'n a ring dik a, goal-a lut loin ban a per hrim hrim bawk.

Real tan a tawpah Ronaldo a rawn pen chhuak a, minute 120 chhungin player langsar ber ni lo mah se chakna goal a rawn khung a, champion a hriat meuh chuan Portugal captain hming a langsar ber.

Ngaihnawm

ρ Atletico hian European Cup/Champions League final vawi thum an khel tawh a, a chak lo zawkah an la ṭang vek.

ρ Tun ṭum hi Champions League final-a extra time khelh a ṭul vawi riatna a ni a, penalty shootout vawi sarih an petna chiah a ni bawk.

ρ Zinedine Zidane hi Miguel Munoz zawha Real Madrid player leh manager ni chunga European Cup/Champions League champion ni leh thei hmasa ber a ni.

ρ Zizou hi French manager zinga Champions League champion thei hmasa ber a ni.

ρ Sergio Ramos hi Champions League final vawi hniha goal khung thei pangana a ni. Raul, Samuel Eto'o, Lionel Messi leh Cristiano Ronaldo te'n UCL final vawi hnihah goal an lo khung tawh.

ρ Antoine Griezmann hi 2012 finala Arjen Robben-a'n penalty a hlah hnua hun pangngaia penalty khung lo hmasa ber a ni.

ρ Atletico manager Diego Simeone aia Champions League final chak lo tam chu Italian manager Marcello Lippi chiah a awm.