Zidane a inngaitlawm

Real Madrid leh France legend Zinedine Zidane hi a inkhelh hun laiin Champions League-ah vawi khat a lo champion tawh a, Real tana nomawi a chawi hma hian Juventus-ah vawi hnih lai final-a vanduai zawkah a ṭang.

Manager a nih hnuah Zidane-a'n hun rei a mamawh lo, Los Blancos a enkawl aṭanga thla lina lekah Champions League nomawi a hlawk chhuak nghal.

Kum 43-a upa Zidane chuan, "Hun rei tak kan khelh avangin pressure a tam lehzual a, Champions League meuha kan champion theih avangin ka lawm hle a ni. Final-a chak tur hian kan thawkrim a, president (Florentino Perez) in mana-ger hna min pek khan nomawi chawi hi ka ngaihtuahnaah a awm nghal. Player kan neih ṭhat vanga cham-pion kan ni," tiin a thiamna vanga champion an nih loh thu a sawi.

Diego Simeone fakin Zidane chuan, "Atletico tana a hnathawh avangin Simeone hi ka fak duh a ni. Coach ṭha tak a ni a, inkhelh apiangin chu chu a lantir ṭhin. Chutihrualin keini lam pawhin hna ṭha tak kan thawk a, Champions League-a player, assistant leh coach anga ka champion thei hi ka lawm a ni," tiin a sawi.