Ṭap lo turin ka hrilh - Simeone

Atletico Madrid-in Champions League champion theihna hun ṭha kum thum chhungin vawi hnih an bawhpelh a, San Siro Stadium-a Los Rojiblancos ṭantute leh player-te an insum zo lo a ni ber.

Argentine coach Diego Simeone chuan, "Hun tawp hamrik han hriat kha chuan inkhela thil thlen dan thlir let dan pawh ka thiam lo. Kan hliam ngaiah bawk hliam kan tuar nawn a ni. Bul ṭan ṭha tawk lo mah ila kan sut leh thei hram a, extra time kha chu thluak hmanga inbeihna a ni tawh. A tawpah erawh a vanduai zawkah kan ṭang a, tumahin pahnihna an hre reng ngai lo," tiin pahnihna an ni leh ta mai chu pawi a tih thu a sawi.

Player-te fak zuiin Simeone chuan, "Ka player-te an thawkrim em em a, an hnahthawhah ka chhuang bawk. Hei vang hian ka player-te chu ṭap lo turin ka hrilh. Final lut turin Barcelona leh Bayern Munich kan hneh a, final-ah pawh ka player-te khan an theihna zawng zawngin an khel a ni. Gabi hnathawh kha thlir ula, pla-yer chawn tha chat tam lutuk khan kan theihna zawng zawngin kan khel tih a sawifiah a ni. Lisbon-a kan chak lo nen khan ka rilru natna zawk sawi tur ka hre lo a, min tihrehawmtu erawh min ṭantute champion lawm-na hun kan siam sak thei lo kha a ni," a ti.