Argentina chak zanah Messi a inhliam

Season hmang ṭha tak Gonzalo Higuain chuan a goal khung theih chhunzawm zelin Zirtawpni zan khan Argentina-in 1-0 a Honduras an hnehna inkhelah goal awmchhun a khung. Napoli striker goal ropui khung zana langsar ber erawh hliam vanga lakchhuah captain Lionel Messi a ni.

Messi hi Minute 64-naah a hnunga hliam a tawrh avangin lakchhuah a ni a, Barcelona thiampuipa dinhmun hi chiang taka puanchhuah la ni lo mah se Copa America-a an match hmasa ber June 6-a Chile nen an khelh hunah a inlan theih erawh beisei a ni lo.

Argentina coach Gerardo Martino chuan, "Messi hian a hnungzângah hliam a tuar a, a dinhmun hi zirchian mek a ni. A natna hi chiang taka sawi theih a ni lo a, na erawh a ti hle. A chanchin kan ngaichang mek a, engkim a chiang thuai ang," tiin an ram captain chungchang a sawi.

Season hman zawh taka league goal 36 khunga season khata Serie A-a goal khung hnem ber Gino Rossetti-a record nih rualtu Higuain chuan, "Hliam na tak a nih loh hram kan besei a, Leo hi kan tan a pawimawh em em a, kan nghah hram hram a ngai a ni," tiin an captain hliam chungchang a sawi ve bawk.

Argentina hi Copa America khelh turah Group D-ah awmin Panama, Bolivia leh Chile te nen ram 16 inelna tournament-ah hian quarterfinal luh an inchuh dawn a ni.