Juventus leh Alves inhnaih

Barcelona full-back Dani Alves chuan Serie A champion Juventus chu tunkar chhung hian a zawm fel hman tura ngaih a ni a, Turin club hian Javier Mascherano pawh an rim nia sawi a ni.

Brazil international Alves hian Catalan club tan kum riat a khelh chhungin champion nomawi 23 teh meuh a chawi pui tawh a, club inelna hrang hranga champion theihna zawng zawngah chuan a champion kim.

Kum 33-a upa Alves hian kum hnih daih contract a ziak tura ngaih a ni a, kum khatah pound maktaduai 3.5 a hlawh dawn niin an sawi bawk, a ṭul a nih chuan a contract hi pawh sei theih a ni ang.

Juve hian Argentina international Mascherano pawh kum hnih chhung atan lakluh an duh a, inbiakna neih mek niin Barca nen hian an inrem thei a nih chuan Italian champion hian Spanish champion lak aṭangin an player pawimawh pahnih an laksak dawn tihna a ni.

Massimiliano Allegri kaihhruaina hnuaiah Juve hian Serie A leh Coppa Italia lamah rorel hneh viau mah se beisei angin Champions League-ah an la hlawhtling lo a, Europe-a champion turin player tawnhriat nei ṭha an zawng niin a lang.