Ibra tel loin Sweden chak zo lo

Euro 2016-a an champion theih thu Zlatan Ibrahimovic-a'n sawi mah se Thawhṭanni zana an friendly match-ah erawh champion tur khelhin Sweden an khel lo a, an captain Ibra tel lo hian Slovenia chu goal awm loin an inhnehtawkpui.

Sweden player zingah Ibra bakah midfielder Kim Kallstrom leh Albin Ekdal te chu hliam vangin bench-ah dah an ni a, coach Erik Hamren-a'n tawnhriat nei tlem player rual chhawr chungin Slovenia a hmachhawn.

Malmo khawpuia inkhelah Celta Vigo striker John Guidetti chu Sweden tlarhma mawitu a ni a, kum 24-a upa striker hian Euro 2016 khelh a phu zia tilangin Slovenia tlarhnung chhaih buaitu ber a ni. Sweden tan Sebastian Larsson chuan freekick aṭangin goal khungna hun ṭha nei bawk mah se a chhawr ṭangkai thei lo.

Goal hmaa hlauhawm ngun zawk erawh mikhual team Slovenia an ni a, Euro 2016 khel phak lo team hian vawi tam Sweden goal rum-
ṭhaih mah se goalkeeper Andreas Isaksson-a'n goal a chhuah duh miau loh avangin team pahnih hi 0-0 in an ṭin ta a ni.

Sweden hian Euro 2016 khel tura France an pan hmain Pathianni zan khian Wales chu friendly match an khelhpui leh dawn a, Euro-ah hian Bel-gium, Italy leh Repub-lic of Ireland-te nen group khatah awmin quarterfinal luh an inchuh ang.