Ruah sur vangin French Open khel thei lo

Thawhṭanni zan khan France khawpui Paris-ah ruah nasa taka a sur avangin kum 16 chhunga a vawi khat nan French Open inkhelh tur zawng zawng a hun sawn a ni.

May 21 aṭanga khelh ṭan French Open hi a ni hmasa ber aṭangin ruahsur vangin inkhel tih khawtlai a ngaih bakah a hun sawn a ngai hial. Mipa leh hmeichhe last 16 inkhel tur zawng zawng pawh ruah sur nasa lutuk vangin a hun an sawn vek.

Mipa world number 1 Novak Djokovic chu seeded 14-na Roberto Bautista Agut nena inhmachhawn tur niin WTA number 1 Serena Williams chu seeded 18-na Elina Svitolina hmachhawn tur a ni bawk, nizan khan harsatna dang a awm a nih loh chuan French Open hi khelh chhunzawm tura ngaih a ni.

Grand Slam pali zinga clay court-a an khelh awmchhun French Open hi kumin hi a ṭum 115-na niin khawtual mipa player zingah Richard Gasquet chiah a dam tawh a, ani hian quarter final-ah world number 2 Andy Murray a hmachhawn dawn.

Australian Open leh Wimbledon khelhna court langsar Rod Laver Arena leh Centre Court chu ruah a sur thut pawha buai lohna turin a chung khuhna siam a ni tawh a, US Open khelhna hmun langsar Arthur Ashe Stadium pawh kumin aṭangin a chung khuhna tur siam a ni dawn. Ruah sur duh hunlaia khelh ṭhin French Open erawh kum 2020 khian khuh fel hman tura ruahman a ni chauh thung.