Westwood leh Bengaluru an inṭhen

I League champion Bengaluru FC chuan an mana-ger Ashley Westwood nen inhriatthiam tawnnaa an inṭhen thu nimin khan an puang a, season tharah chuan English manager hi Bangalore club-ah kan hmu tawh dawn lo.

Manchester United Acade-my chhuak Westwood hian July 2013 khan Bengaluru hi zawmin I League-a an season hmasa berah nomawi a chawipui nghal a, a season hnihnaah pahnihna dinhmun luahin Federation Cup-ah an champion thung. Tun season I League-ah nomawi chawi lehin AFC Cup-ah quarterfinal an lut tawh bawk.

Mahse, kum 39-a upa mana-ger hian I League nomawi an chawi zawhah Bangalore club chu a chhuah-san mai theih thu a sawi a, a hlawh pangngai aia tlem zawk hlawh tura contract zawrh a nih vang niin a lo sawi tawh.

Singapore leh India nena sawizawm hlawh mek coach chuan, "BFC ka cham chhunga ka hnathawhah ka lawm a, engmah loa bul ṭan-in tun hun hi kan thleng a ni. Nomawi liantham pathum ka chawi a, 'Coach of the Year' awards tam tak dawngin player naupang zawkte ram tana khel thei turin ka chher chhuak a, ka tum ram chu he hmunah hian ka hlen a ni, " a ti.

Westwood chuan sawi chhunzawmin, "Players, staff leh management team hnen-ah lawmthu ka sawi a, a bik takin fan-te chungah lawmthu ka sawi bawk. West Block Blues-ten kei leh ka chhungte thinlungah hmun pawimawh an chang reng ang," tiin a club hlui chu a mangṭha.

Bengaluru FC CEO Parth Jindal chuan, "Ashley West-wood leh he club kan in- ṭhen a ngai ta mai hi a pawi kan ti. Mahse, he club tana ṭha ber tur ngaihtuah chunga thutlukna kan siam a ngai a, Ashley nen uluk taka kan titi hnuah he thutlukna hi kan siam ta a ni. League sang zawkah hlawhtlinna a chan chhunzawm ka beisei ," tiin an coach chu a thlah ve bawk.