France chakna Payet freekick

Premier League thlir ṭhin bulah Dimitri Payet-a freekick pet thiam zia sawi nawn a ṭul lo a, West Ham midfielder hian Thawhṭanni zana Cameroon an hneh ṭumin minute 90-naah freekick aṭangin chakna goal a khung.

Stade de la Beaujoire, Nan^-tes-a friendly match-ah France-in Cameroon 3-2 in an hneh. Euro 2016 thlengtu leh champion tura rinkai hian Blaise Matuidi leh Olivier Giroud hmangin ṭum hnih hma hruai mah se mikhual team-in Vincent Aboubakar leh Eric Choupo-Moting hmangin an sut ve ve. Chak zawk an awm tawh dawn lo emaw tih hnuah Payet freekick hmangin Didier Deschamp-a hoten hnehna an chang.

Qualifier khel lo

France-in Euro 2016 an thlen avangin qualifier an khelh a ngai lo a, hemi chhung hian friendly match an khel thung. Deschamp-a naute hian nikum June thlaa Albania an hneh loh hnuah tun ṭum hi match kua an khelh lehna chiah a ni a, England tih loh chu an khingpui an hneh vek.

Kum 1998 khan Deschamp-a captain-na hnuaiah France hian an ramah FIFA World Cup an champion tawh a, tun ṭumah pawh hian player neih ṭhat vangin champion tura rinkai an ni. Amaherawhchu field pawn buaina vangin Karim Benzema chu squad-ah telh a ni lo a, Real Madrid striker tel lo chuan France tlarhma hi an ṭhat theih dan ber a ni dawn lo.

Goal tamna

Kingsley Coman ball thiam vang liau liauin France-in goal an khung a, minute 20-naa Bayern winger thawhrah sengtu chu Matuidi a ni. Cameroon-in minute hnih hnuah an sut nghal a, Aboubakar goal hi France tlarhnung ṭhat tawk loh vangah a ngaih theih.

First half tawp hma minute li la awmin Paul Pogba-a'n midfielder ṭha bik a nih zia pholangin ding lam aṭanga Juventus ball vawrh ṭha zet chu Giroud tan hlah chi a ni lo. Arsenal forward hian Cameroon defender tihsual vangin second half-ah chance
ṭha zawk a nei leh a, goal hnihna a khung thei lo.

Gunners defender Laurent Koscielny tihsual vangin Eric Choupo-Moting-a'n minute hnih chiah a awm tawh tihin Cameroon tan a pet goal a, 2-2 a ni. A tawpah player danglam bik a rawn lang a, Payet-a'n freekick hmangin minute 90-naah a khung. Hammers midfielder-in goal ropui a khungna hmun hi career a ṭanna stadium Stade de la Beaujoire a ni.

Payet leh freekick

Chakna goal khungtu Payet chuan, "Freekick aṭangin goal kan han khung a, vawi thumte kan khung tlin hi chuan mipui hi chuan freekick ka pet dawn chuan goal khung turah min ngai tawp tawh. Hei hi thil thleng dan chu a ni bik lo a, zanin erawh a thlen fuh ṭum a ni. Goal hian ka team a chhanhim em chu ka hre lo a, kan chakna erawh a ni chiang a ni," tiin mipui beiseina a san thu a sawi.

Payet hian Premier Lea-gue-ah Crystal Palace leh Manchester United lamah freekick aṭangin goal ropui a khung tawh a, mipuiin an beisei sang hi a mak lo.