AFC Wimbledon chanchin ngaihnawm chu! England 9th Division aṭangin League One

Thawhṭanni zan khan League Two playoff final-ah AFC Wimble­don leh Plymouth Argyle an inhmachhawn a, Wimbledon-in Lyle Taylor leh player chanchin ngah Adebayo Akinfenwa penalty khung hmangin 2-0 in hnehna an chang a, season tharah League One an khel dawn.

Wimbledon-in season thara league an khelhna tur hi England league system-ah third tier chauh nimahse he club hian ngaihven a hlawh nghal - kum 2002-ah he club hi din ve chauh a nih vang leh khawvela footballer chak ber an tih Adebayo Akinfenwa a khelh vang a ni.

Wimbledon zinkawng

Kum 2001 khan Wimbledon F.C. chuan Football Association hnena an club awmhmun sawn an dilna chu pawmsak an ni a, Wimbledon hmar lama km 56-a hla Milton Keynes-ah kum 2003-ah insawnin an club hming pawh Milton Keynes Dons tih a ni.

Wimbledon fans chuan an club sawn chhuah hi sawn a nih hma hauhin an do nasa a, mah se thutlukna hi kaltlangpui tho an tum avangin kum 2002 khan Wimbledon fans lungawi lote chuan bul ṭan ṭha turin an khaw hming chawiin AFC Wimbledon an din a, Combined Counties League (9th division)-ah bul an ṭan.

The Wombles (Wimbledon sawi­na)-te hian awihawm loh khawp­in hma an sawn nghal a, season 13 chhungin vawi ruk lai promotion an hmu a, tunah chuan 9th division club khan League One an khel dawn ta!

Wimbledon fapa!

AFC Wimbledon manager Neal Ardley chuan, "Kum 14 liam taa an club hmangaih em em chhuhsak an nih vanga hliam tuar mipui 25,000 hmaa kan hlawhtlinna hian min ti lawm a ni," tiin Wembley-a an inkhel ṭawiawmtu fan-te a fak.

Wimbledon khaw chhuak, player a nih laia Wimbledon-a bul
ṭantu manager chuan, "Kum 11 leka upa ka nih laiin Wimbledon-ah bul ka ṭan a, keimah ang thoa he club hmangaihtute hmaa hlawhtlinna nena ka ding ta mai hi a mak a ni. Eng anga thawnthu ngaihnawm pawh kan ziak a ni thei a, hei aia ngaihnawm erawh a tam lo ang," tiin a sawi.

Kum 43-a upa Neal Ardley hian player a nih laiin kum 1991-2002 chhung Wimbledon FC tan a khel a, an khaw club hi a chhuahsan hnuah Watford, Cardiff City leh Millwall-ah te khel lehin kum 2007 khan football a chawlhsan.

Football a chawlhsan tur thu a puan ni 30 August 2007 khan Cardiff City academy-ah manager tura lakluh a nih thu puan a ni nghal a, 10 October 2012 khan AFC Wimbledon manager tura lakluh niin tunah chuan League One an khel dawn ta.

Tu nge Akinfenwa?

League One-a Wimbledon an kai thu puan a nih hnu lawkah an striker pawimawh Adebayo Akin­fen­wa chuan club-in an chhuah zalen thu a puang ve nghal a, 'The Beast' tia hminglem an vuahsak striker chanchin hian ngaihven a hlawh nghal.

Kg 101-a rit, mu chunga kg 200 rit chawi thei striker hi khawvela footballer chak ber tia sawi ṭhin a ni a, Liverpool fan ruhkawl a ni bawk.

Kum 34-a upa striker hian nikum January thlaa khelmual chhunga Steven Gerrard leh Diego Costa an intihbuai ṭumin Chelsea striker hi a lo vau tawh a, "Costa, Stevie do zawnga
ṭawngkham khat pawh i chhak chhuak leh a nih chuan nang nen hian buaina kan nei dawn tih hria ang che," a lo ti tawh!

Nikum FA Cup-a Liverpool nen an inhmachhawn ṭumin a ṭhian­te chu Steven Gerrard-a jersey chuhpui lo turin a lo vau tawh a, Reds lamah hian goal khungin Stevie G jersey a hlawh bawk.

A career-ah League One aia sang club-ah a la khel ngai lo a, Doncaster Rovers, Swansea City, Northampton Town leh club hrang hrang tana lo khel tawh striker hian a career-ah match 500 chuang khel tawhin goal 170 chuang a khung tawh bawk.

Khawilamah nge?

Thawmhnaw siam ṭhin com­pany 'Beast Mode On' neitu ni bawk Akinfenwa hian inkhelh zawhah an club-a khel tura duhtu manager-te chu whatsapp-a amah dawr mai turin a hriattir!

Wimbledon manager Neal Ardley kuah pahin Akinfenwa chuan, "He manager hian min chhuah zalen dawn a ni. Hei aia Wimbledon mangṭhana duhawm zawk hi ka tan a awm chuang lo. Thawnthu ngaihnawm tak ang mai a ni. Division sang zawkah kan kai a, goal ka khung a, hei hi chu thawnthu ang pawha ka ziah thiam loh tur a ni," tiin Wimbledon a mangṭha danah a lungawi hle.

Akinfenwa hian kum 2014 khan Wimbledon hi a zawm a, a season hmasa berah goal 15 khungin club top scorer a nih bakah Player of the Year a ni bawk a, tun season-ah erawh goal nga chiah khungin season a khar thung.