Pellegrini chawl hlen mai thei

Manchester City cham-pion nomawi pathum a chawi pui hnuah Manuel Pellegrini chu season thar aṭangin Pep Guardiola-a'n Etihad Stadium-a a hna a luahlan dawn a, Chile manager hian a duh ang tak team enkawl tur a hmu lo a a nih chuan coach hna a chawlhsan mai theih thu a sawi.

Kum 62-a upa Pel-legrini chuan, "Ka duh leh chak zawng tak enkawl tur ka hmuh hma chuan ka nghak rih mai ang a, hetiang ang a thleng lo anih chuan coaching hi ka chawlhsan pawh a ni thei," a ti. Chile manager hian chona thar hmachhawn tur erawh chuan a la inpeih reng thu a sawi tel bawk.

Season tharah hian Premier League-ah manager langsar kan hmu leh nual dawn a, Barcelona manager hlui Guardiola bakah hian Chelsea chuan Italy coach Antonio Conte an la lut a, Manchester United chuan Blues ban hnu Jose Mourinho an nei fel ve leh tawh bawk.

English league a ngaih-nawm dawn thu sawi chhunzawmin Pellegrini chuan, "Premier League pumpui hi a ngaihnawm dawn a, kumina Leicester City an champion theih dan aṭang ringawt pawh khan eng pawh a thleng thei tih a chiang," tiin a chhuahsan tur league chu tun hma zawng ai pawha a ngaihnawm zawk a rin thu a sawi.