India chhandam nan Lianzuala goal a tawk zo lo!
Sunil Chhetri a chawl a, tuin nge a hmun ruak luah ang? tiin Indian football ngainatute an inzawt - a chhanna chu Lallianzuala Chhangte a ni a, Chettri awm loh hnua India match hmasa berah goal a khung.
Mahse, Lianzuala goal hian India a chakpui zo lo a, Thawhlehni zan khan Qatar chu khualmualah 2-1 in an ngam lo a, FIFA World Cup 2026-ah India a inlan dawn lo - World Cup-a India inkhel lai hmuh chu dam rei nghah thil a ni leh ta phawt.
Lianzuala hian minute 37-naah India tan goal hmahruai a khung a, AIFF Player of the Year hoin Blue Tigers hi an chak mai dawn niin a lang hman. Mahse, second half-ah player naupang rual nena khel Qatar an tho a, India an ṭap.
Qatar hian Youssef Ayman Farahat hmangin si phurh an sut a, minute 73-na a ni. Minute 85-naah Ahmed Alrawi chuan a khung belh leh a, India tan thawhleh ngaihna a awm tawh lo - group A inkhel dangah Kuwait chuan 1-0 in Afghanistan an hneh a, Qatar hnungzuiin third round an lut ve bawk.
Chak mamawh India
India-in Qatar nena an intawn hmain, Asian champion laka hlauthawng miah loa khel turin chance an nei a, mahse, an hun ṭha neih an bawhpelh ṭhin avangin match tawp berah hlauthawngin an awm - third round lut turin Qatar lakah chak an mamawh.
Blue Tigers vanneihna turin third round lut chiang tawh Qatar-in an team ṭha ber an hruai lo a, India an mikhual hma hian Afghanistan nen pawh an inhnehtawk - Blue Tigers tan beiseina a awm.
Lianzuala pawhin, "Kan chak ngei ngei a ngai tawh," tiin inkhelh hmain Vanglaini a hrilh a, India-in chak an tumruh. Blue Tigers beiseina chhi nung turin Lianzuala hian mawhphurhna a la vat a, minute 37-naah goal a khung nghal.
Lunglei tlangval goal khung hi Brandon Fernandes siamsak a ni a, Goan midfielder ball pek a ṭhat tluk zetin goal khung tura LZa che vel hmu tan goal hmaa Mumbai City forward hriamzia a lang.
Mahse maw
Goal dang lut loin chawlhlawk hman a ni a, hetihlai hian Kuwait leh Afghanistan pawh 0-0 in an inhnehtawk - inkhel tawp ta se, India-in World Cup qualifier third round an lut dawn tihna a ni a, first half an thunun bawk avangin beisei a sang.
Mahse, minute 73-naah beisei loh thil a thleng. Khelmual pawna ball awm tawh Qatar player-ten an thai let a, a 'out' tawh miau avangin India player-ten dan tum buai loin an en - mahse, ball let leh lam hi Youssef Ayman Farahat chuan net tawn puar nawlh khawpin a pet.
Replay-ah pawh chiang taka a lan laiin, assistant referee-in a phar lo a, referee-in goal-ah a pawm zui. Video assistant referee awm ngat se, goal-ah pawm a ni lo ang - sawisel fo ṭhin VAR hlutzia a lang, tih pawhin a sawi theih.
India-in dik lo taka goal an chhuah hnuah an tha a zuai a, Blue Tigers player-te an tui tawh lo a ni ber. Minute 85-naah Ahmed Alrawi chuan Qatar tan a khung ve leh a, 2-1 in Qatar an chak daih.
Mangṭha World Cup!
World Cup-ah ram 32-in inelna an hmachhawn ṭhin a, World Cup 2022 thleng khan Asia khawmualpuiin team kan neih theih zat chu 4.5 a ni. Mahse, kum 2026 aṭangin team tel thei zat hi 46-ah tihsan a ni a, Asia pawh 8.5 hmun ruak kan nei tawh.
Hei vang hian India tan pawh beisei a sang - group A-ah Qatar, Kuwait leh Afghanistan an awmpui a, third round an luh theih mai rinna a lian. Mahse, India-in Qatar lakah point hlawhchhuah an nei lo a, Kuwait lakah point li hmu mah se, team nem bera ngaih Afghanistan lakah point khat chiah an hmu bawk.
A tawpa India chan tawk chu second round-a World Cup qualifier thlah liam a ni a, keini ho hian World Cup-a India inlan lai kan hmu hman ang em aw, tih chu zawhna chhan harsa tak a ni - a let aia tam maha Asia-in hmun kan neih hnuah pawh third round kan la lut thei lo!
Mizo tan erawh hmasawnna hmuh tur a awm. Kuwait nen an inkhelh ṭumin Blue Tigers squad-ah Mizo pali an awm a, Qatar lakah pathum an awm. Lza bakah Edmund Lalrindika leh David Lalhlansanga te an ni a, Edmund hian minute 87-naah Lza thlakin Qatar a hmachhawn a, ram tan match hnih a khel ta.