Goal awm lo tak a ni - Stimac

Qatar-in sawisel kai takin si phurh an sut a, India World Cup beiseina an tihtawpsak. Blue Tigers coach Igor Stimac a lawm lo a, Croatian coach hian Qatar goal khung dan chu na takin a dem.

Stimac chuan, "Goal dik lo hmangin si phurh an rawn sut a, Qatar kha an vannei hle. Replay ka en a, ka chiang lehzual - ball kha pawnah a awm tawh a, mahse, goal-ah pawm a ni miau si!

"Tun ang khawvela football-ah chuan khatiang kha thleng lo tura ka duh a ni a, kha goal khan engkim a thlak danglam ta a ni ber. Ka player 23-ten beiseina sang tak an nei a, chu an beisei tihlawhtling tur chuan theihtawp an chhuah a, midang thil tihsual vang mai maia an beiseina tihtawpsak an ni kha na ka ti a ni," a ti a, a lawm lo hle.

Stimac chuan Indian player-te fak zuiin, "Zanina ka naute khelh danah sawisel tur ka nei lo. An ti ṭha takzet a, Indian fan-te pawhin an team hi chhuang hle rawh se. Team ṭha tak Qatar kha nawr reng chungin, hun tam zawk game kan thunun a ni.

"Qatar aiin chance kan nei ṭha zawk a, first half-ah khan goal thum vel khung a, match kha titawp thei kan ni. Mahse, Indian football-ah hian buaina kan nei reng a, chu chu box chhunga finishing theih a ni," a ti.

Hetihlai hian India chak loh rualin Stimac ban duhna thawm social media hrang hrangah a ri lehnghal a, Croatian coach hian, "Third round-ah India ka hruai thleng lo a nih chuan ka bang ang," tiin a lo sawi tawh a ni.