Remruata'n BAI advance coaches programme zo

Mizoram badminton tan chanchin lawmawm hriat tur a awm leh ta a, Badminton Association of India (BAI) aṭangin H. Lalremruata chuan Advance Coaches Programme Certificate a hmu thar.

Saron Veng tlangval Remruata hian BWF Coach Education Level-1 leh Padukone Management hnuaiah Beginner Level Badminton Coaches Certificate Course pawh a lo zir zo tawh a, Advance Coaches Programme Certificate a dawng leh ta a ni.

National Centre of Excellence, Guwahati-a neih BAI Advance Coaches Programme-ah hian foreign aṭanga lo kal coach ṭha pahnih, Russia lam mi Ivan Sozonov leh Sankar Annamalai, Malaysia lam miten training an pe.

March 21-28, 2024 chhung khan he programme hi neih niin, a duh apiang coach tan chhim ngawt theih a ni lo a, India ram hmun hrang hrang aṭangin coach thlan bik mi 36-in he programme hi an chhim a ni.

Foreign coach Sozonov leh Annamalai ten training an pek piahlamah hian, Indian badminton-a coach ṭha berte zinga mi Balachandra TR, Sachin Rana leh Umendra Rana ten foreign coach-te hi pui bawmin, programme hi an vil bawk.

Mizoram Badminton Association (MBA) chuan thuchhuah siamin, badminton coaching lama certificate hlu tak H. Lalremruata'n a dawng thar chu an lawmpui hle tih an sawi a, "Mizorama badminton ngaina tute tan coaching kaltlanga malsawmna thlentu a ih zel theih nan duhsakna kan hlan a ni," an ti.