Man United enkawl zel tur Erik Ten Hag

Manchester United thuenitute chuan season hmasa an hman dan uluk takin an thlir kir a, an manager ni lai Erik Ten Hag chu season thara an team enkawl zel turin a la ṭha tawkah an ngai, midang an melh lo.

Dutch manager Ten Hag-a'n contract a neih lai hi season thar lo awm tur zawh ruala tawp ve tur a ni. Club lamin la puang chiah lo mah se, khawthlang chanchinbu mite chian Old Trafford-ah hun rei zawk cham turin contract a ziak dawn niin an sawi.

Season an hman danah Man United ṭantute lung a awi vek lo mai thei, mahse Wembley Stadium-a FA Cup final an khelhah Manchester City 2-1 a hnehin an champion, nomawi an chawi hian manager laka an rilru put dan a ti danglam deuhin a rinawm.

Man United leh manager hrang hrang sawi zawm a ni hman - Thomas Tuchel leh Mauricio Pochettino te bakah Graham Potter, Thomas Frank, Roberto de Zerbi leh England manager Gareth Southgate te hming pawh lamrik a ni.

Hetih lai hian Ten Hag chu chawlh hmangin Ibiza lamah a awm mek. Club neitu Sir Jim Ratcliffe leh thuneitu dang te chuan an manager chungah rinna an nghat a, Ten Hag-a'n United manager hna a thawk chhunzawm dawn.

Ten Hag hian season hnih chhungin United hi nomawi pahnih a chawi pui a, hna a thawh dan kawngah a puitlingin player naupang zawk chher kawngah hna a thawk ṭha tawk niah an ngai.

A kaihhruaina hnuaiah rawlthar duhawm Kobbie Mainoo leh Alejandro Garnacho te an che ṭha a, anni pahnih hi kum 19 mi chauh la ni mah se an hriam tawh, season tharah Dutch manager hian a kaihruai chhunzawm ang.

Bazar kawngah leh player enkawl lamah erawh a che fuh vek bik lo - Mason Mount leh Antony ten an man ang phu khawpin an khel phak lo a, khelmual pawn lamah Mason Greenwood leh Jadon Sancho ten buaina an nei bawk.

Ajax manager hlui hian a ngaihdan a thlak mai mai ngai bik lo a, a enkawl theih loh player chu a chhuahtir hreh lo. Season tharah chuan player naupang zawkte nen hmathlir neiin an khel dawn niin a lang.

Kum 2013 khan Sir Alex Ferguson-a'n Man United enkawl hna a chawlhsan a, a hnuah Ten Hag bakah hian David Moyes, Louis van Gaal, Jose Mourinho leh Ole Gunnar Solskjaer ten English club enkawl hna hi an lo thawk tawh bawk a ni.