Australia-in Super 8 an lut

T20 Cricket World Cup-ah Australia chuan match hmasa pathumah hnehna chang vekin Super 8 an lut. Aussies hian nimin zing khan Namibia chu wicket kuain an sawp a, South Africa nen Super 8 an lut tawh.

An inthlau

Sir Vivian Richards Stadium-ah Australia-in vawm hmasak an thlang a, Namibia captain Gerhard Erasmus-a'n 36 siam mah se thlawptu ṭha dang a nei lo. Aussies-in an bowler ṭha Mitchell Starc te an hahdamtir chungin Namibia batter-te tan an la ṭha mah mah.

Adam Zampa-a'n wicket li lain 12 runs chauh a pe a, Josh Hazlewood (18/2) leh Marcus Stoinis (9/2) ten wicket hnih ve ve an la. Namibia hi over 17-ah an thi vek a, 72 runs chauh an siam.

Australia tan target harsa a ni lo a; David Warner (20), Travis Head (34*) leh Mitchell Marsh (18*) te hmangin over 5.4 lekah 74/1 runs an siam a, hnehna an chang.

ICU-ah Sri Lanka leh Pakistan

Sri Lanka-in South Africa leh Bangladesh te an hneh tawh loh avangin Super 8 luhna kawng a zim a; June 11, Thawhlehni zan khan an hneh ngei tura ngaih Nepal hmachhawn tur an ni. Mahse, Florida-ah ruah a sur nasat avangin an inkhel thei lo. Point hnih hmuh theihna turah Sri Lanka-in point khat chauh an hmu a, an match khelh hmabak Netherlands an hmachhawn hma ngeiin an tla fel ang.

Pakistan-in US leh India an hneh loh hnuin wicket sarihin Canada an hneh a, Super 8 beiseina chhi nung mah se inkhel dang result-ah an innghah tawh. 2014 champion Sri Lanka hi tla tura ngaih theih an ni a, 2009 champion Pakistan pawhin Lions hnung hi an zui a rinawm hle.