Andhra Pradesh leh Odisha sorkar thar la lut

Lok Sabha inthlan ruala state assembly inthlan neihna zinga mi, Andhra Pradesh leh Odisha-ah nimin khan sorkar thar lak luh a ni.

Andhra Pradesh-a hian Telugu Desam Party (TDP) chuan hnehna changin, Odisha-a hian BJP an chak thung. State pahniha sorkar thar lak luhna hun hi prime minister Narendra Modi chuan a hmanpui ve ve a ni.

Andhra Pradesh :

Telugu Desam Party (TDP) hotu, Chandrababu Naidu chu Andhra Pradesh chief minister atan lak luh a ni a, hei hi Andhra Pradesh ṭhendarh a nih hmaa CM a nih ṭum lina leh, ṭhendarh a nih hnua ṭum hnih CM a nihna a ni. Deputy chief minister atan an thawhpui, Jana Sena hotu Pawan Kalyan lak luh a ni ve bawk.

Prime Minister Modi bakah union home minister Amit Shah leh BJP sorkarna state-a chief minister ṭhenkhatin Andhra Pradesh sorkar thar lak luh inkhawm hi an telpui. Amit Shah chuan Thawhlehni zan khan Naidu hi a chenna inah tlawhin, lawmpuina pawh a lo hlan tawh a ni.

Andhra Pradesh assembly inthlanah khan seat 175 awmah TDP hian seat 135 zet an la a ni. An thawhpui, Jana Sena Party leh BJP chuan seat 21 leh 8 an la ve bawk.

CM leh Dy CM bakah, minister atan MLA 23-te chu lak luh an ni bawk a, JSP tan minister chanvo hi pathum leh BJP tan pakhat pek niin, a bak chu TDP MLA ten an chang vek a ni. Minister atan lak luh zingah hian Naidu-a fapa, Nawra Lokesh pawh a tel.

Odisha :

Odisha-ah chief minsiter Mohan Charan Majhi kaihhruai BJP sorkar chu nimin tlai dar 5 khan lak luh a ni a, Odisha-a BJP sorkar a din ṭum khatna a ni. Prime minister Narendra Modi bakah union minister leh BJP rorelna state-a chief minister eng emaw zatin sorkar lak luh inkhawm hi an telpui a ni.

Odisha Assembly inthlanah khan BJP hian assembly seat 148 awm aṭangin seat 78-ah hnehna an chang a, Naveen Patnaik kaihhruai rorellai BJD chuan seat 51 an la thung. BJP leh BJD hi kum 1998-2009 chhung khan thawk dunin, Lok Sabha inthlanṭum hnih leh Assembly inthlan ṭum hnih an hmachhawn hman a ni. Mahse kum 2009 khan Patnaik chuan BJP an thawhpuina hi a titawp.

Thawhlehni khan BJP hruaitu, defence minister Rajnath Singh chuan Odisha chief minister tur hian MLA ṭum li lo ni tawh, tribal hnam, Mohan Charan Majhi chu thlan a nih thu a puang a ni. Deputy chief minister atan KV Singh Deo leh Pravati Parida te ruat an ni bawk.